Tơ̆ jơ pơma đam, rim anih jang mŭk drăm hlôi pơtruh 66 tơdrong lơ̆m dôm tơdrong jang: jên hu, anih mong jên, groi teh, thuê̆, asong jang, logistics, păng hla bar hanh chinh. Minh ƀar tơdrong kăl hloh nhen pơkăp asong tŏk iŏk hăm anih jang mŭk drăm pơm tơlĕch tơmam drăm choh jang xa, ăn tŏk iŏk jên kiơ̆ kơ mŭk drăm hlôi đei dah mă đei lơ̆m khei năr hơnô̆ hơnăp kơnh, ưh iŏk dah mă tơjur thuê̆ hơtŏk kơjă ăn kaphê klong jơk, tơgŭm hơtŏk tơring pơtăm tơmam drăm, sơđơ̆ng păng hơtŏk kơmăi kơmŏk pơm tơlĕch tơmam drăm xa...

Kơdră Anih jang vei lăng kon pơlei dêh char Gia Lai Phạm Anh Tuấn pơkăp gô hơlen, sek tơlang dôm nơ̆r pơtruh đơ̆ng anih jang mŭk drăm, pơkăp pơm kiơ̆ dôm tơchơ̆t gah hơtŏk 'lơ̆ng tơdrong asong jang, tơplih 'nao gơh hơgei, tơplih kơmăi kơsô̆, tơgŭm anih jang mŭk drăm iĕ păng pah lăp. 'Nguaih kơ noh, Gia Lai gô asong jên jang gah hơtŏk tơdrong jang kăl, khua hŏk – kŏng ngê̆, hơtŏk tĕch pơdro, sek tơlang dôm tơdrong tơhlăk gah anih jang, hơtŏk anih jang kŏng ngĭp, păng vei sơđơ̆ng unh hơyuh; hơtŏk pơtho bơngai jang trŏ hăm tơdrong kăl pơm jang, hơtŏk kơtang tơdrong tơguăt anih jang mŭk drăm – hnam trưng.