'Nâu jing kơtơ̆ng ang ah Hop akŏm Ƀan châ̆p hanh Đảng ƀô̆ dêh char Gia Lai pơih să 'măng mă 18. Tơ̆ hop akŏm, rim bơngai tang măt hlôi akŏm pơma đam gah tơdrong hơkŏp jang kiơ̆ Tơchơ̆t kơsô̆ 18 đơ̆ng Ƀan châ̆p hanh Trung ương Đảng “gah minh ƀar tơdrong pơtoi tơplih 'nao, hơmet jơnŭm jang chĭnh trĭ mă bot 'lơ̆ng, pơm jang đei jơnei tơnăp”.

Ƀok Huỳnh Quang Thái, Kơdră jơnŭm Pơgơ̆r Tĭnh uy Gia Lai ăn tơbăt, dêh char hlôi hơlen păng akŏm dôm tơdrong pơgơ̆r jang 'nao đơ̆ng Trung ương, pơm trong vă rim anih jang, rim tơring băt hơdah păng pơm kiơ̆ trŏ tơchơ̆t. Gia Lai hlôi pơtơm hơkŏp tơdrong jang kiơ̆ Tơchơ̆t 18, tơlĕch trong jang tôm păng gô khŏm mă hơmet jơnŭm jang bot 'lơ̆ng, pơm jang jơnei tơnăp.