Tơ̆ Hơnih tĕch mơdro tơmam ming mam tơ̆ tơring Phù Cát, dôm năr đơ̆ng rŏng kial hơbŭt kơsô̆ 13, lơ tơmoi hloh dơ̆ng pơtêng hăm khei năr hmă, găh lơ ‘noh tơmoi răt gŏch păngkem. Ƀok Nguyễn Văn Cát oei lơ̆m thôn Phú Kim, tơring Phù Cát  ‘nao răt đang 100 tŏ gŏch pơbŭng hnam. Ƀok Cát akhan, tơdrong kăl hloh hrei ou ‘noh tơmam drăm đei tĕch mơdro tơtom ăn kơ kon pơlei vă hrôih ming hơmet hnam oei hơmet ăn lơ̆m khei ‘năr ‘mi kial kơtang. “Ba ƀôh kơjă ưh kơ măh tŏk măt dang yơ. Mă kăl hloh ‘noh hơnih đe sư tech mơdro đei tôm, kon pơlei ‘meh vă răt iŏk ‘noh đei hloi vă pơm hơmet pơbung hnam, ưh kơ pă chă gô chang bơih.”

Tơ̆ rim Hơnih tĕch mơdro, kơjă tơmam drăm đei pơklep hloi tơ̆ hơnăp ‘măng hnam, tơgŭm ăn kon pơlei ƀônh chă lăng. Lơ tơ-‘ngla hnam tĕch mơdro tơroi akhan khei ‘năr đơ̆ng rŏng ‘mi kial hơbŭt pơrăm ‘noh jing jơ ‘năr kăl chă tơgŭm djru dih băl, ưh kơ gơ̆h chă tŏk kơjă tơmam drăm. Mŏ Nguyễn Thị Thu Thúy, tơ-‘ngla hơnih tĕch mơdro Sơn Quân, thôn Phú Kim pơma:“Kơjă hlôi đei tơchơ̆t đơ̆ng ki hei bơih, đei ‘măng mĭnh pơbŭng hnam mĭnh ƀar hrĕng tŏ tablô jei kơjă ‘noh mưh dang ei kon pơlei ưh kơ măh mĭnh ƀar tŏ tablô đe sư năm tơ̆ ou răt jei tĕch hăm kơjă ‘noh mơ̆n, đei ‘măng răt tŏ sĕt dêh hnang ‘noh ăn đech kơ kon pơlei ưh kơ iŏk jên đe sư ôh.”

Ƀok Nguyễn Ngọc Minh, tơ-‘ngla hơnih tĕch mơdro tơmam drăm ming man Hồng, phương Quy Nhơn Nam tơbăt, lơ̆m mă lơm mạng tơpôl đei ƀôh lơ tơdrong kơtơng ang akhan gŏch păng kem ưh kơ gan đei, kơjă tŏk măt hloh ƀar, pêng ‘măng ‘noh tơ̆ Gia Lai’noh ưh kơ lơ loh ôh. Rim hơnih tĕch mơdro lơ̆m dêh char dang ei oei răk đei lơ tơmam drăm ming man đơ̆ng hơdrol pơyan ‘mi kial măh mai ăn kon pơlei chă răt yoa.“Oei hơnơ̆ng chă tĕch hăm kơjă ‘noh ưh kơ tŏk kơjă ôh, kem hăm ‘long, 2 tơmam drăm ou ‘noh kon pơlei ‘meh răt lơ hloh, ba oei đei tơmam răt răk so kơna ba tĕch hăm kơjă đêl so ưh kơ tŏk kơjă ôh.”

Vă veh ver đei tơdrong răk ôn gô chang dang yơ tŏk kơjă vă tĕch, khul bơ̆ jang vei lăng mơdro sa dêh char Gia Lai hlôi dăr lăng păng ăn vă jê̆ 400 ŭnh hnam tĕch mơdro tơmam drăm ming man kĭ pơkăp sơđơ̆ng kơjă, ưh kơ pơgơ̆m vă đei iok yoa sa lơ; adoi atŏk kơtang dăr lăng hơlen vă sơđơ̆ng ăn tơdrong tĕch răt tơmam drăm. ‘Nhŏng Lê Đình Tân, Bơngai bơ̆ jang dăr lăng Khul Vei lăng mơdro sa kơsô̆ 4, Hơnih sơdrai vei lăng mơdro sa dêh char Gia Lai tơbăt:“Rim kŏng ty kĭ pơkăp hăm khul bơ̆ jang ‘noh gô tĕch kơjă sơđơ̆ng ăn kon pơlei, khul bơ̆ jang vei lăng tĕch mơdro iung jang hơdoi hăm kŏng ang pơtho tơbăt ăn rim ŭnh hnam tĕch mơdro tơgŭm djru kon pơlei, tĕch mơdro lơ liơ mă trŏ lăp vă yak hloh khei ‘năr ‘mi kial pơrăm.”

Tơdrong rim hơnih mơdro sa, ŭnh hnam tĕch mơdro lơ̆m dêh char Gia Lai iung jang vei kơjăp sơđơ̆ng kơjă, atŭm hăm tơdrong vang iung jang tơtom đơ̆ng khul bơ̆ jang, hlôi tơgop lơ̆m tơgŭm ăn kon pơlei hrôih ming hơmet hnam oei, hlôi tơgop tơgŭm ăn kon pơlei ming hơmet hnam oei, sơđơ̆ng hơrih sa đơ̆ng rŏng kial hơbŭt kơsô̆ 13 pơrăm.