Gia Lai đei trong tơlei ŭnh hơyuh 500KV păng 220kv kơjung vă jê̆ 800km, găn hlŏh lơ tơring mir kon pơlei kon kông. Gơnơm hơnơ̆ng chă pơrô̆ pơrôp pơtho khan găh sơđơ̆ng jĭh tơlei ŭnh hơyuh kơna kon pơlei pơm kiơ̆ ‘lơ̆ng, atum hăm hơnĭh jang ŭnh hơyŭh vei lăng năng ‘lơ̆ng jrăng păng tơlei ŭnh hơyuh. ‘Nhŏng Rmah Chơn, pơlei Breng 2, tơring Ia Dêr, apŭng Ia Grai, dêh char Gia Lai đei 2ha chehphe tơjê̆ trong tơlei ŭnh hơyuh 500kv tơbăt: “Ĭnh đei mir chehphe găh hơla trong tơlei ŭnh hơyuh, kơdĭh ba păng ŭnh hnam pơm  ‘lơ̆ng rim tơdrong tơchơ̆t găh sơđơ̆ng jih trong tơlei ŭnh hơyuh. Ĭnh păng ŭnh hnam jei chă pơtho khan ăn kon pơlei ư̆h kơ gơ̆h chă tơtông klĕ, dôm ŭnh hnam đei mir pơgar chehphe, ‘long pơtăm tơ̆ hơla jĭh trong tơlei ŭnh hơyuh ‘nŏh pơm kiơ̆ kơjăp rim tơdrong tơchơ̆t găh sơđơ̆ng jĭh trong tơlei ŭnh hơyuh”.

Găh Hơnih pơtruh ŭnh hơyuh Gia Lai, dơnŏ anĭh hơnơ̆ng dăr lăng tơdrong sơđơ̆ng trong tơlei, tơmơ̆t jên jang răt kmăi kmŏk păr UAV vă bơ̆ jang dăr lăng ‘lơ̆ng, chă hơmet ming sư̆ tơlei ŭnh hơyŭh jang hăm jơ̆ng ti păng hăm kmăi kmŏk Hotline vă pơm dă ƀiơ̆ đunh jơ tơpĭt ŭnh hơyuh. Mă kăl tơ̆ rim hơnĭh biến áp, bơngai bơ̆ jang kơ hơnĭh hơnơng pơm kiơ̆ jơ ‘năr pơjao jang vei lăng, chă hơmet ming, hơmet pơ ‘lơ̆ng dôm tơdrong ƀô̆h hlĭch kmăi kmŏk. ‘Nhŏng Trần Văn Trang, Bơngai gak tơm kơ hơnĭh biến áp 500 kV Pleiku 2, Hơnĭh pơtruh ŭnh hơyuh Gia Lai pơma: “ Lơ̆m pơyan au pơtrŭh ŭnh hơyuh rim tơlei biến áp tôch kơtang, hơnơ̆ng đơ̆ng 80 trŭh 90% kơna ‘nhŏng ŏh gak bơ̆ jang lăng kơjăp tơdrong au păng chă lăng hơlen tôch kơtang. Mư̆h pơtrŭh kơtang ‘nŏh tơdrong đei hơmơt trŭh kmăi kmŏk, tơlei ŭnh hơyuh păng đei ƀô̆h tơdrong au to lơ̆m jơ ‘năr pơtruh. Dang ei, kmăi tĭnh tơƀô̆h tơbăt tơdrong pơtrŭh ŭnh hơyuh đei tôm ngăl bơih, bơngai gak lăp chă lăng hơlen kiơ̆ kmăi tĭnh păng lăng hơlen đĭ đăng dôm tơdrong bơ̆ jang găh kmăi kmŏk.Dôm tơdrong yă kiơ đei ƀô̆h au to jei pơtrŭh lơ̆m kmăi tĭnh ngăl kơna bơ̆ jang dăr lăng len hiôk ƀiơ̆, lăng hơlen đei ƀô̆h tơdrong đei răm au to ƀô̆nh hlŏh” .

Kiơ̆ đơ̆ng ƀok Trần Khánh Trung, Kơ iĕng Kơdră chĕp pơgơ̆r Hơnih pơtrŭh ŭnh hơyuh Gia Lai, atŭm hăm 783km trong hơlei ŭnh hơyuh 220kv păng 500Kv, hơnĭh au vei lăng păng bơ̆ jang hloi 2 hơnĭh biến áp 500kV, 1 hơnih biến áp 220Kv. Hơnĭh hlôi răt yua kmăi kmŏk kơsô̆, tơmơt jên jang răt kmăi kmŏk gơ̆h hơgei lơ̆m bơ̆ jang vei lăng au to. Đơ̆ng nŏh pơm dă ƀiơ̆ tơhoach kon jên bơ̆ jang păng bơ̆ jang ‘lơ̆ng hlŏh: “ Lơ̆m sơnăm 2022, Kŏng ty pơtruh ŭnh hơyuh 3 ‘nŏh hơnih pơm jŭk kơ Tổng Kŏng ty hlôi jang kiơ̆ jơnei iŏk yua kmăi kmŏk păr UAV lơ̆m vei lăng tơlei ŭnh hơyuh. Trong jang chă tơchĕng tơ iung pơjing kmăi kmok vei lăng hơnih biến áp hăm kmăi kmŏk hơgei vă iung jang ‘lơ̆ng, ƀô̆nh hlŏh ăn bơngai bơ̆ jang. Dôm trong pơchŏh jang au, mư̆h jang kiơ̆ hlôi pơm tơplih bơ̆ jang hăm jơ̆ng ti jing jang kiơ̆ kmăi kmŏk kơtơ̆ng ang kơna hlôi jơnei ăn bơ̆ jang kiơ̆ trong jang kmăi kmŏk kơsô̆ jăl jang 2021 – 2025 kơ Tổng Công ty  Pơtrŭh ŭnh hơyuh Teh đak pơma atŭm hăm kơ Kŏng try pơtruh ŭnh hơyuh 3 pơma hơdrô̆”.