VOV4.Bahnar - Khei nả au ki, pơlŏm găh tơdrong ŭh kơ hô̆h vao păng tơdrong ẻĭh sa tơnap tap kơ kon pơlei kon kông tŏ mĭnh ƀả tỏing Chư̆ Đang Ya, apŭng Chư̆ Păh, dêh char Gia Lai, mĭnh ƀả ‘nu bơngai hlôi hơlenh pơdăr tơgar iŏk hla bơar tơngal tĕh. Tơpă yan au, lơ tơdrong hơlĕnh pơdăr au lăp ƀô̆h mư̆h đe hăp pơm hla bơar tĕch ăn bơngai nai dăh mă pơm hla bơar pơdơ̆ng mŭk drăm vă tŏk iŏk đơ̆ng hơnĭh mong jên, kơna pơm ăn tơdrong tơnap mă pơm hơmet pơ ‘lơ̆ng.

Klo akăn mŏ Kưm tơtăm hli hiong 5 sao mir

Mŭh măt sơ ‘nhôi, mŏ Kưm (rơneh sơnăm 1978, oei tơ̆ pơlei Xoă, tơring Chư̆ Đăng Ya, apŭng Chư̆ Păh, dêh char Gia Lai) tơbăt, ĭnh tôch tơtăm hli hiong tĕh mir 5 sao tơ̆ tơpang ti đe nai. Mŏ Kưm tơroi, sơnăm 2018, kơ yuơ vă đei kon jên jang sa, klo akăn mŏ drơ̆ng ăn bơngai lơ̆m pơlei ‘nŏh Vũ Thị Hằng mơng tĕh jang sa lơ̆m 10 sơnăm, hăm kơ jă 100 trĭu hlak jên. Lơ̆m khei năr au, yă Hằng ăn klo akăn măr sư kĭ mĭnh ƀar hlak hla bơar vă drơ̆ng mĭnh nơ̆r mơng tĕh. Ngêh ngăi đơ̆ng rŏng 10 sơnăm ‘noh iok tơvĭh jang sa dơ̆ng, mă lei trŭh khei 1/2022, mư̆h kang ƀô̆ bơ̆ jang Pơm hla bơar Tĕh apŭng Chư̆ Păh năm tơ̆ hnam apĭnh hơlen, mŏ mă băt tĕh ŭnh hnam hlôi tơplĭh hơnăn ăn kơ yă Hằng đơ̆ng khei 8/2020, dang ei bơngai au tŏk bŏk pơm hla bơar tĕch ăn bơngai nai:“Ba tơchĕng jei jĭ kơ̆l tơpă mơ̆n, tep pă sŭk tơpă mơ̆n. Ba ăn mơng, mă lei tă jing ăn kơ yă ‘nŏh pơm tơngla, pă băt lơ liơ hloi bơih. Đe hăp krao ŏh hơdruch, mĕ ƀă năm kơtĭt hơnglou ti tơ̆ hla bơar, pơm hơmet dơ̆ng hla bơar, ba băt băi đơ̆ng yơ. Yă ‘nŏh tŏk bŏk pơkă vă pơm hơmet hla bơar ăn kơ ĭnh dơ̆ng. Tơdăh yă Hằng ư̆h kơ pơm hơmet ăn kơ ĭnh lei ĭnh năm tơkêng tơ̆ tơring hloi”.

Klo akăn ‘nhŏng Chang, oei tơ̆ pơlei Xoă, tơring Chư̆ Đang Ya, apŭng Chư̆ Păh

Tơ̆ pơlei Xoă, ŭnh hnam ‘nhŏng Chang (rơneh sơnăm 1981) jei tôch tơtăm hli hiong pơgar 300m2 tŏk bŏk erĭh sa. Kơ yuơ lơ̆m sơnăm 2020, ŭnh hnam ƀok hlôi iŏk Hla bơar pơm tơngla tĕh kơ ŭnh hnam ăn kơ Yă Hằng vă yă au tơgŭm năm tŏk iŏk jên đơ̆ng Hơnĭh mong jên. Đơ̆ng nŏh trŭh dang ei, ŭnh hnam ‘nhŏng Chang jei tim mă iŏk đei kon jên tŏk iŏk ayơ, găh hla bơar tĕh jei hiong dong hloi. Dĭng trŭh vă đĭ khei 2 sơnăm 2022, mư̆h mĭnh khŭl bơngai năm tơ̆ hnam athei ăn 140 trĭu hlak jên, ‘nŏh klo akăn ‘nhŏng mă băt hla bơar tĕh ŭnh hnam hlôi răm yă Hằng pơdơ̆ng ăn kơ đe vă tŏk iŏk kon jên:“Đe năm tơ̆ hnam athei ăn jên hre, athei ĭnh ăn 140 trĭu hlak jên ‘mơ̆i mă pơdreo hla bơar tĕh. Ĭnh akhan, ĭnh ư̆h kơ đei iŏk kon jên au. Ĭnh năm tơ̆ hnam yă Hằng ‘nŏh yă Hằng khan lê̆ hăp ăn, kơ yuơ Hằng iŏk, gô hăp tơchă jên ăn kơ đe đơ̆ng nŏh iŏk tơvĭh hla bơar tĕh au, ba tơtăm tôch kơ dêh văi, sŏng sa pă lŭ, tep pă nĭt. Ĭnh ‘nao tơroi ăn thôn trơng đĕch, găh kơdră tơring ‘nŏh tim mă tơroi”.

Ƀok Hoàng Anh Tuệ - Kơdră chĕp pơgơ̆r Dơnŏ anĭh bơ̆ jang Pơm hla bơar tĕh apŭng Chư̆ Păh, dêh char Gia Lai tơbăt, lơ̆m sơnăm 2021, lơ ‘măng yă Vũ Thị Hằng pơm hla bơar tĕch mơdro tĕh păng dôm tĕh au jei tĕh bơngai nai ngăl. Blŭng sơnăm 2022, yă Hằng hơnơ̆ng pơm hla bơar pơdơ̆ng tơ̆ hơnĭh mong jên păng tĕch mơdro dôm tĕh au ăn bơngai nai. Lăng ƀô̆h tơdrong hlĭch lơ lau, hơnĭh bơ̆ jang au iung jang apĭnh hơlen 4 ‘nu bơngai tơngla tĕh tơ̆ tơring Chư̆ Đang Ya ‘nŏh pơ đĭ 4 ŭnh hnam kon pơlei jei ư̆h kơ băt tĕch tĕh au. Kiơ̆ đơ̆ng ƀok Hoàng Anh Tuệ , ƀô̆h tơdrong au pơm kơnê̆ kơtang trŭh hăm kon pơlei, kơna hơnĭh au chĭh hla bơar pơtrŭh athei Dơnŏ anĭh vei lăng kon pơlei rim tơring kăl atŏk kơtang jơhngơ̆m đon bơ̆ jang tơnăp hlŏh dơ̆ng lơ̆m tơgŭm djru kon pơlei kon kông găh tơdrong chă tĕch răt, pơdơ̆ng tĕh vă tŏk iŏk jên au to:“Hăm rim tơring kon kông ‘nŏh kang ƀô̆ jang tư pháp tơring kăl atŏk kơtang hơnăp jang. Mư̆h bơ̆ jang pơm hla bơar ăn kon pơlei ‘nŏh kăl đŏk hơdăh ăn 2 păh mơ̆ng, apĭnh hăm tĕch tĕh dăh mă ư̆h. Kon kông ư̆h kơ băt nơ̆r Yuăn ‘nŏh kăl đei kang ƀô̆ kon kông kơtă chă tơblang hơdăh vă kon pơlei hlôh vao”.

Ƀok Nguyễn Văn Nội- Kơdră chĕp pơgơ̆r Dơnŏ anĭh vei lăng kon pơlei tơring Chư̆ Đang Ya, apŭng Chư̆ Păh tơbăt, hrei au, khŭl kơdră tơring păng rim hơnĭh bơ̆ jang tŏk bŏk dăr lăng hơlen tơdrong tĕch răt tĕh tơ̆ tơring lơ̆m khei năr tơjê̆ au, adoi vang iung jang tơroi tơbăt athei kon pơlei kơchăng hlŏh dơ̆ng mư̆h chă tĕch răt dăh mă pơdơ̆ng tĕh:“Mư̆h băt tơdrong au, nhôn hlôi pơrô̆ athei kŏng ang păng rim hơnĭh bơ̆ jang năm hloi tơ̆ rim ŭnh hnam, năm trŭh rim pơlei, pơrô̆ pơtho tơbăt ăn rim ŭnh hnam vă veh ver đei tơdrong ư̆h kơ ‘lơ̆ng hơ iă, răm đe hơlĕnh pơdăr lơ lau”.

Lăp đơ̆ng rŏng băt tơdrong, dang ei Dơnŏ anĭh vei lăng kon pơlei apŭng Chư̆ Păh, dêh char Gia Lai athei rim hơnĭh bơ̆ jang pơdơ̆h hloi bơ̆ jang pơm hla bơar tĕch răt tĕh vă kŏng ang apŭng năm bơ̆ jang dăr lăng hơlen, pơm hơdăh tơdrong tĕch răt tĕh glăi đei ƀơm trŭh kon kông tơ̆ tơring  Chư̆ Đang Ya.

Bơngai chĭh: Nguyễn Thảo

Tơblơ̆ nơ̆r: Amazưt