VOV4.Bahnar - Pơ gê ‘năr 7/7, 5 ‘nu bơ ngai răm lơ̆m grŭp tơ dăm tơ̆ plei Kloong, xăh Ia O, apŭng Ia Grai, dêh char Gia Lai đei tĕch tơ̆ Campuchia hlôi đei dŏng iŏk, ăn brŏk tơ̆ dêh char Gia Lai sơ đơ̆ng. Đại tá Trần Thanh Bình- Phŏ pơ gơ̆r Ƀô̆ đô̆i vei lăng tơ ring sơ lam dêh char Gia Lai tơ băt, 5 ‘nu bơ ngai răm âu ‘noh Puih Đại (rơ neh sơ năm 1998), Puih Môi (rơ neh sơ năm 2004), Ksor Jối (rơ neh sơ năm 2004), Puih Chiêu (rơ neh sơ năm 2003), Ksor Gum (rơ neh sơ năm 1999). Grŭp tơ dăm hơ dai hăm Kpuih Thái (rơ neh sơ năm 1994) păng Kpuih Phú (rơ neh sơ năm 2006) đei dŏng ƀơ̆t ‘năr 3/7 păng ‘năr 4/7 âu ki tă kơ đơ̆ng Trần Quang Quyết (rơ neh sơ năm 2001, oei tơ̆ xăh Ia Dal, apŭng Ia Hdrai, dêh char Kon Tum) hơ lĕnh tĕch tơ̆ Campuchia lơ̆m 2 năr ‘năr 20 păng ‘năr 21/6/2022 âu ki.

5 ‘nu tơ dăm đei dŏng, pơ jao ăn Linh vei lăng tơ ring sơ lam Việt Nam kơ sơ̆ ‘năr 6/7 tơ̆ ‘Măng jang sơ lam Mộc Bài-dêh char Tây Ninh  (Rup:Linh vei lăng tơ ring sơ lam Gia Lai pơ truh ăn)

‘Năr 5/7 âu ki, Kơ đông linh vei lăng tơ ring sơ lam Ia O (Linh vei lăng tơ ring sơ lam dêh char Gia Lai) kŭm hlôi tơ kêng pơm yoch tĕch mơ dro bơ ngai, hơ dai hăm gơ̆ih hla ar hô sơ păng pơ jao bơ ngai pơm yoch Trần Quang Quyết ăn anih jang kanh sat dăr hơ len Kŏng an dêh char Gia Lai hơ nơ̆ng dăr hơ len, pơm rơ đăh kiơ̆ tơ drong gơh jang.

Thuem: Tơ blơ̆