Dôm tơring pơlei oei sa ‘nao gô đei pơjing tơ̆ tơring Cát Tiến, Đề Gi, Phù Mỹ Đông, Phù Mỹ Bắc, An Hòa hăm phương Quy Nhơn Đông, vă sơđơ̆ng hơnih oei sa jang sa ăn rim ŭnh hnam kon pơlei yông oei đơ̆ng rŏng ‘mi kial pơrăm ou ki. Akŏp kon jên tơmơ̆t jang ăn 9 tơdrong jang ou ‘noh hloh 178 ti hlak jên, iŏk yoa kon jên jang Teh đak păng rim kon jên jang anai. Hơnih chĕp vei lăng tơdrong vă jang Choh jang sa păng atŏk tơ iung tơring choh jang sa dêh char Gia Lai đei pơjao pơm tơm tơmơ̆t jên jang, iung jang chă rơih hơnih ming man păng pơm pơkeh hla bơar kiơ̆ tơdrong tơchơ̆t. Tơdrong vă jang ou đei tơlĕch jang lơ̆m jăl jang 2025–2026, hăm tơdrong tơm pơm sơđơ̆ng hơrih sa, hơmet pơ ‘lơ̆ng choh jang sa păng pơm tơjur hiong răm ăn kon pơlei tơring ‘mi kial pơrăm.