Lơ̆m jơ ‘năr sir sơlŭng pơtăm chehphe, ƀok R’com Thắng ƀôh mĭnh ƀar tơmam drăm đei jou ‘nou tơmam drăm kơ ƀô̆ đô̆i nhen săng pơnhar, tơlei tơ̆n păng hlôi năm tơroi ăn Khul kơdră Ƀô̆ đô̆i tơring Ia Phĭ. Sơng iŏk đei kơtơ̆ng ang, Khul K52 iung jang hơdoi hăm Khul kơdră Ƀô̆ đô̆i tơring atŭm hăm ŭnh hnam ƀok R’com Thắng năm dăr lăng truh tơ̆ hơnih. Pơih să hơnih sir tơchă, khul bơ̆ jang hlôi tơchă ƀôh kơting ƀô̆ đô̆i lôch dŏng teh đak atŭm hăm lơ tơmam drăm ‘noh đei kơting blu, pôih tơgơ̆ pơchăh, mĭnh ƀar tŏ sơnĕnh păng lơ kơcheh kơting pơchăh tŏk bŏk vă jê̆ bŭk. Khul bơ̆ jang jei tơchă ƀôh 3 tŏ sơnĕnh vă tơgŭm djru ăn bơ̆ jang khăm hơlen ADN kiơ̆ tơdrong tơchơ̆t. Dang ei kơting ƀô̆ đô̆i lôch dŏng teh đak hlôi chơ truh tơ̆ Hơnih chĕp pơgơ̆r Ƀô̆ đô̆i tơring Ia Phí vei lăng păng pơm pơkeh hla bơar ou to kiơ̆ tơdrong tơchơ̆t.