Tơ̆ Hop akŏm tơdrong jang mơdro sa găh tơmang lăng apŭng plĕnh teh sơnăm 2026 hăm hơnăn “Hơtŏk sơng đei tơmoi apŭng plĕnh teh truh hăm Việt Nam: Anih tĕch mơdro ‘nao - Tơmam ‘nao - Jang hơdai ‘nao”, Khŭl jang Tơmang lăng Việt Nam hơlen lăng, đơ̆ng rŏng jăl jang tơiung ming pran kơtang, tơmang lăng Việt Nam tŏk bŏk ƀrư̆ ƀrư̆ yak mơ̆t lơ̆m jăl jang tŏk ‘nao, athei tơplih đơ̆ng tơdrong hơgăt hơtŏk kơsô̆ lơ jing hơtŏk đei rơih iŏk, ‘lơ̆ng păng kiơ̆ lơ̆m jang hơdai.

Dôm nơ̆r pơma tơ̆ Hop akŏm âu akŏm lơ̆m trong jang anih tĕch mơdro tơmoi apŭng plĕnh teh, hơnăp jang mơdro sa tơmang lăng lơ̆m jang hơdai gre păr - tơmang lăng - hơnih truh păng hơnhăk Gia Lai mơ̆t lơ̆m hla kak tơmam tơmang lăng apŭng plĕnh teh kơ Việt Nam. Hăm Gia Lai, tơdrong pơgơ̆r Hop akŏm đei tơdrong ‘lơ̆ng gĭt kăl lơ̆m khei ‘năr tơring tŏk bŏk pơih să hơnih hơtŏk tơiung tơmang lăng, tơgoăt hơdai đak dơsĭ Quy Nhơn hăm bri kông Tây Nguyên, hơdai hăm tơmang lăng pơdơh ngôi, bri brăh, chă lăng păng joh ayŏ kơdŏ soang.