Tơ̆ pơm lêh tơlĕch jang, Khul chĕp pơgơ̆r hlôi krao hơvơn rim hơnih kŏng đoàn, rim hơnih bơ̆ jang, tơpôl, hơnih mơdro sa, bơngai hơvơh đe jang lơ̆m dêh char đei dôm trong jang hơdăh, tơpă jang kiơ̆ Khei iung jang vei lăng sơđơ̆ng tơdrong jang păng Khei kŏng nhân đei pơgơ̆r đơ̆ng năr 1 truh năr 31/5. 

Rim hơnih mơdro sa, khul jang hlôi akŏm iung jang rim tơdrong jang vei lăng năng tông tơdrong bơ̆ jang, tang găn hơlau sar bar lơ̆m bơ̆ jang păng tơdrong jĭ jăn đơ̆ng bơ̆ jang, vei lăng năng tông jơhngơ̆m pran jăng grăng akau ăn bơngai jang, sơđơ̆ng dơ̆ng kơjăp jơhngơ̆m jăn ăn bơngai jang. Khei Kŏng nhân sơnăm 2023 hăm hơnăn “Tơgoăt dih băl kŏng nhân, tơ iung pơjing khul jang”, Jơnŭm vei lăng Tơdrong jang dêh char Gia Lai akŏm pơgơ̆r rim tơdrong jang vei lăng năng tông đoàn viên, bơngai jang nhen: iung jang hơdoi hăm mĭnh ƀar hơnih mơdro sa pơgơ̆r rim hơdrơ̆r pơdă tơmam drăm păng tĕch re tơmam drăm ăn kŏng nhân bơngai jang; tơgum djru khăm, tơbăt hơdăh găh tơdrong jĭ măt ăn bơngaoi jang; pơgơ̆r năm ngôi, tơgŭm djru kŏng nhân bơngai jang đei tơdrong jĭ jăn, đei jĭ rơka đơ̆ng bơ̆ jang au to ŭnh hnam tơnap tap.