Dêh char athei rim tơring pơm kơđeh trong jang, tơgŭm hơdrol pôk rĭ dôm ŭnh hnam đei hnam hơlih păng jăh pơm đang anih jang kăl vă kon pơlei sơđơ̆ng tơdrong hơrih sa đunh đai. Kiơ̆ kơ hla ar pơtruh yua đơ̆ng Anih vei lăng găh Choh jang sa păng Cham char ‘nao pơtruh ăn Anih vei lăng kon pơlei dêh char, Gia Lai gô pôk rĭ hăt hot 1.861 ŭnh hnam tơ̆ 16 tơring; lơ̆m noh đei 9 tơring păh Hơlĕch (dêh char Bình Định so) hăm 907 ŭnh hnam kon pơlei, păng 7 tơring păih Pơmơ̆t, hăm 954 ŭnh hnam kon pơlei.

Akŏm jên pơm hơnih oei hle tơchĕng hơdrol hloh 1.840 ti hlak jên, vă ming man anih jang kăl, tơgŭm kơtă ăn kon pơlei păng bơ̆jang tơdrong jang chưk pơ ‘ngoăih teh. Ƀok Phạm Anh Tuấn, Kơdră Anih vei lăng kon pơlei dêh char Gia Lai tơbăt, vă tơdrong ăn oei tơ̆ plei hle hrĕnh păng đei yua, rim tơring pơm kơđeh trong jang, dăr hơlen, tơlĕch trong jang găh ‘meh vă hơmet ăn kon pơlei oei hơlam, tơgep. Lơ̆m noh, tơgŭm hơdrol pôk rĭ kon pơlei oei tơter đak dơsĭ đei hnam hơlih.