VOV4.Bahnar – Lơ̆m năr 12/8, Anih vei lăng kon pơlei dêh char Gia Lai hlôi pơgơ̆r Hop akŏm tơlĕch xơnong jang ăn xơnăm hŏk 2022-2023. Tơ̆ hop akŏm khul kơpal kơ Anih vei lăng kon pơlei dêh char pơkăl Anih jang pơtho pơhrăm păng rim tơring hơmet tơnăp ăn xơnăm hŏk, ưh đei lê̆ hŏk tro yơ kơyuơ tơnap tap mă athei lê̆ hŏk.

Kiơ̆ pơkăp, xơnăm hŏk 2022-2023 tơ̆ Gia Lai gô pơtơm đơ̆ng năr 29/8/2022 hăm vă jê̆ 400.000 'nu hŏk tro păng hơ ioh mâm non. Vă hơmet tơnăp ăn xơnăm hŏk 'nao, dêh char hlôi axong hloh 623 tih hlj vă ming hơmet anih jang, tơmam pơtho hŏk pơhrăm, axong iŏk 1.244 bơngai pơtho ăn dôm jăl hŏk. Tơ̆ hop akŏm, yă Nguyễn Thị Thanh Lịch – Phŏ Kơdră Anih vei lăng kon pơlei dêh char Gia Lai pơkăl anih jang pơtho pơhrăm vei xơđơ̆ng tơnăp atŭm hăm anih jang y tê̆ hơtŏk ƀet vaccine bơ̆ng jĭ COVID-19 ăn hŏk tro; tơlĕch jang tơnăp dôm trong tang găn păng tơjră pơrang jĭ lơ̆m hnam trưng; hơtŏk pơhlôh ăn bơngai pơtho bơngai jang kơpal tơpă pơm jang đei jơnei, vei xơđơ̆ng mong ƀiơ̆ hăm 3 tơdrong pơkăp kơ teh đak tơrĕk găh pơtho pơhrăm; pơtoi hơtŏk pơ 'lơ̆ng tơdrong pơtho tơ̆ tơring kon pơlei kon kông.

Lan chih păng pơre nơ̆r