Bơ̆jang kiơ̆ Tơdrong tơchơ̆t 57 đơ̆ng Anih tơm Chĭnh trĭ găh tơplih kơsô̆, dêh char Gia Lai akŏm hơtŏk kơmăi kơmŏk kơsô̆ tơ̆ tơring păng hơmet ăn tơdrong gơh băt kơsô̆ ăn kang ƀô̆, bơngai jang kơ teh đak, bơngai jang păng kon pơlei, mă loi ‘noh jĭ tơ̆ tơring hơtăih hơtŏ, tơring kon pơlei kon kông. Truh dang ei, tơdrong jang tơplih kơsô̆ đei lơ jơnei ‘lơ̆ng.

Đơ̆ng ‘năr 1/7, Anih vei lăng kon pơlei dêh char Gia Lai hlôi jang đang hơmet ăn anih jang, kơmăi kơmŏk, trong tơley Internet tơ̆ 135 xăh, phường đơ̆ng rŏng kơ tơmơ̆t hơdai, vei sơđơ̆ng sơng iŏk, hơmet pơ ‘lơ̆ng hla ar hiôk ăn kon pơlei. Grŭp kơmăi kơmŏk kơsô̆ tơpôl đei pơvei tơ̆ đĭ đăng rim xăh, phường, dêh char Gia Lai tơgŭm kang ƀô̆ 1 ‘măng păng pơtho kon pơlei pơm bơ̆n hla ar trực tuyến. Tơdrong tơlĕch jang hrơ̆ch 1 ‘măng hlôi pơm tơplih rơđăh ‘lơ̆ng lơ̆m tơdrong jang vei lăng, hơmet ming bơ̆jang, hơdai hăm hơtŏk ‘lơ̆ng đon hlôh vao kơsô̆ lơ̆m tơpôl, pơtrŭt tơplih kơsô̆ tôm tong.