VOV4.Bahnar - Tết Nguyên Đán Nhâm Dần 2022 oei vă truh, tơ drong vei lăng măh mai tơ mam păng vei kơ jăp kơ jă tơ mam tơ̆ anih tĕch mơ dro ‘nŏh jĭ tơ drong tơm đei Anih jang kơ măy, tĕch mơ dro păng dôm tơ ring, anih tĕch mơ dro tơ̆ Gia Lai kơ chă bơ̆ jang.

Dôm siêu thĭ tơ̆ Gia Lai’măn răk tơ mam vă tĕch ƀât Tết Nhân dần

Kiơ̆ Anih vei lăng jang kơ măy, tĕch mơ dro dêh char Gia Lai, kơ sô̆ tơ mam đei dôm anih kơ chăng ‘măn răk kiơ̆ nơ̆r hơ găt ƀât Tết Nguyên đán Nhâm Dần tŏk dang 15% truh 30% pơ têng hăm dôm khei lơ̆m sơ năm. Hơ drô̆ khei tơ til Tết, tơ dra adrol tơ drong ‘mĕh răt iŏk tơ mam gô tŏk dang 30% kơ na kơ sô̆ tơ mam đei ‘măn răk đei kơ jă truh 9.100 ti hlak jên. 

Vă pơ truh măh mai tơ mam yoa kăl lơ̆m pơ yan Tết, Anih vei lăng jang kơ măy, tĕch mơ dro dêh char athei rim anih jang, anih tĕch mơ dro tơ lĕch trong ‘măn răk tơ mam kăl, vei sơ đơ̆ng kơ jă tĕch, atŭm hăm ‘nŏh pơ kăp, tơ mam kăp gĭt athei ‘lơ̆ng, đei hla ar chih tơ băt tôm tĕch, chih hơ dăh anih pơm. Kơ chăng tơ jră hăm rim tơ drong ưh sơ đơ̆ng tơ̆ anih tĕch mơ dro, pơm ‘lơ̆ng ăn tơ drong tang găn jĭ Covid – 19.

Dơ̆ng: Tơ blơ̆