Tết Nguyên Đán Qúy Mão 2023 tŏk bŏk vă jê̆ truh, tơdrong vei sơđơ̆ng tơmam păng sơđơ̆ng kơjă tĕch mơdro ‘noh jĭ tơdrong tơm đei anih jang vei lăng găh Kơmăy kơmŏk mơdro sa păng dôm tơring, anih mơdro sa tơ̆ Gia Lai kơchăng tơlĕch jang. Vă vei sơđơ̆ng pơtruh tơmam, Anih jang hlôi athei dôm anih jang, anih mơdro sa tơlĕch trong jang mong răk dôm tơmam kăl, mă loi ‘noh jĭ phe, tơmam sa, bơ̆jang kiơ̆ đei yua tơdrong jang sơđơ̆ng kơjă, tĕch tơmam ƀlep kơjă pơklep.

Hơdai hăm ‘noh, dôm anih jang kĭ pơkăp vei lăng sơđơ̆ng ‘lơ̆ng tơmam, đei hla ar tơbăt hơdăh tôm, đei anih pơm tơlĕch rơđăh. Dôm anih mơdro sa lơ̆m tơring hơtŏk ‘lơ̆ng tơpu tơmam, pơm tơdrong ‘lơ̆ng pơjei băl hăm tơmam răt tơmơ̆t đơ̆ng teh đak đe tơgop bơ̆jang kiơ̆ đei yua tơdrong krao hơvơn “ Bơngai Việt Nam yua tơmam Việt Nam”.