VOV4. Bahnar - Tơbăt 97 sơnăm Năr Khŭl chĭh kơtơ̆ng ang Kĕch mang Việt Nam, gơmăng kơnh, Pơm lêh pôk ăn Tơmam hơpăh Chĭh kơtơ̆ng ang Tĕh đak ‘măng mă 16-sơnăm 2021 đei pơgơ̆r tơ̆ Hà Nội. ‘Nau jing tơdrong pơgơ̆r tĭh tên pơm ăn lơ bơngai lăng trŭh mă kăl khŭl chĭh kơtơ̆ng ang lơ̆m tĕh đak. Đơ̆ng 2.000 ƀai vang pơlong, hlŏh lơ ‘măng châm hơlen, Khŭl chĕp pơgơ̆r tơchơ̆t pôk ăn: 10 Tơmam hơpăh A, 22 tơmam hơpăh B, 48 tơmam hơpăh C, 35 tơmam hơpăh pơchhơp jơhngơ̆m ăn rim bơngai, rim khŭl chĭh gơ̆h hơgei trŏ lăp. Rim ƀai vang pơlong Tơmam hơpăh Chĭh kơtơ̆ng ang Tĕh đak sơnăm 2021 hlôi tơbăt tơtom, tôm tong rim tơdrong pơgơ̆r chĭnh trĭ kơ tĕh đak, mă kăl dôm ƀai chĭh đei ƀơm trŭh jĭ hơbŭh Covid-19, tơƀô̆h tơbăt hơdăh dôm tơdrong jang đĭ jơhngơ̆m đơ̆ng rim bơngai chĭh kơtơ̆ng ang. Lơ ƀai chĭh tơƀôh hơdăh iung jang jơnei đei ƀơm ‘lơ̆ng hơ iă lơ̆m tơpôl, đei rim hơnĭh bơ̆ jang kơpal tơgoăt iŏk, xek tơlang, tơpôl kon pơlei pơla hôn bơnê kơtang.

Tơblơ̆ nơ̆r: Amazưt