VOV4.Bahnar - Vă iung jang ‘lơ̆ng tang găn jĭ hơbŭh, lơ̆m khei năr Têt Nguyên đán Nhâm Dần, pơlei tơm Hà Nội athei rim tơrung akŏm, iung jang hloi, mă kăl lơ̆m khei năr tơring hlôi đei ƀô̆h tơpŏh sơmach jĭ vir Omicron. Dôm năr au ki, jô̆ hơtŏ mĭnh năr pơlei tơm đei dang 2.900 ‘nu bơngai tơpŏh. Măt bơngai tơpŏh tŏk bŏk đei vei lăng kơ jăp, mă lei tơdra giĕng trŭh au kơnh rŏ năng tơroi tơbăt măt bơngai tơpŏh tơjur lơ “hơlĕnh” kơ yuơ kon pơlei brŏk vĭh tơ̆ pơlei sa Têt păng gô tŏk lơ dơ̆ng đơ̆ng rŏng Têt. Dang ei, Pơlei tơm tŏk bŏk yak lơ̆m tơdrong pơkăp 2 lơ̆m tang găn jĭ. Pơlei tơm hlôi đei ƀô̆h 14 ‘nu bơngai tơpŏh jĭ sơmach jĭ vir Omicron. Sơmach vir hlôi đei ƀô̆h tơ̆ Hà Nội, tơdrong hơmơt tơpŏh lang să lơ̆m kon pơlei rŏ năng ư̆h kơ jor ôh. Kơ yuơ lơ lŏh, kăl dăr lăng kơ jăp păng pơm kiơ̆ rim trong jang tang găn tơpŏh kơ jăp hlŏh dơ̆ng hăm sơmach jĭ vir au. Dơnŏ anĭh vei lăng jang pơgang pơlei tơm Hà Nội athei rim hnam pơgang iung jang ‘lơ̆ng bơ̆ jang ming hơmet jĭ ăl, khăm ming hơmet jĭ tơtom, ư̆h kơ gơ̆h pơjăh dăh mă chă khăm ming hơmet hiơ hiơ̆.

Tơblơ̆ nơ̆r: Amazưt