Hăm hơnăn “Iŏk yua juăt jue kơ rơbou sơnăm tơdrong juăt păng nuih mơng; tơguăt tơguăl pơjing Đảng ƀô̆ hlăng 'lơ̆ng, kơjăp kơtang; yuk hơlou, hơtŏk hơgei lơ̆m chăl anglŏ sơnăm 'nao; hơtŏk Anih tơm gơh hơgei, 'nao 'lơ̆ng, jơnap”, pơgê năr 16/10 hlôi pơgơ̆r Hop akŏm bơngai tang măt Đảng ƀô̆ pơlei tơm Hà Nội 'măng mă 18 jăl jang 2025-2030 đei 550 'nu tang măt truh akŏm. Kiơ̆ tơroi chinh trĭ ah Hop akŏm, jăl jang ou ki, dôm tơchơ̆t tơlĕch adoi hloh kơ pơkăp, mŭk drăm Anih tơm hơnơ̆ng hơtŏk lơ hloh kơ jơ̆p teh đak. Pơma pơgơ̆r ah Hop akŏm, Tổng Bí thư Tô Lâm ră hơdah: Teh đak bơ̆n, Anih tơm bơ̆n tŏk bŏk oei yak ah chăl anglŏ sơnăm hơtŏk tơ-iung 'nao kơ kon pơlei hăm tơdrong hiôk păng tơnap tap hrơ hrou atŭm.

Tổng Bí thư tơlĕch 7 tơdrong tơm vă Đảng ƀô̆ pơlei tơm Hà Nội akŏm pơgơ̆r jang lơ̆m jăl jang truh. Tổng Bí thư Tô Lâm pơgơ̆r, Hà Nội athei đei pơjing nhen minh “Pơlei tơm gơh hơgei, 'nao 'lơ̆ng, jơnap”, pơkăp truh minh “Anih tơm gơh hơgei – 'nao 'lơ̆ng – kơjăp sơđơ̆ng” hăm kơ̆l 'ngok gơh hơgei kơchăl hơrih păng anih dơ̆ng lơ̆m kơpal teh. Kiơ̆ đơ̆ng noh, pơjing đei “3 anih hơdah hơgei”, iŏk yua tơnăp kơjă kơ jơhnơr hơrih, tơdrong hlôh vao păng jang kiơ̆ kơmăi kơsô̆, 'nhăk Hà Nội jing anih tơm akŏm đei tơdrong so, tơdrong 'nao păng tơdrong hơnô̆ hơnăp kơnh.