Tơ̆ Khánh Hòa, lơ tơring groi kông oei đei tơklăh hơdrô̆. Khŭl kơdră chĕp kơ̆l rim xăh hlôi hơvơn khŭl lĭnh tơgŭm khŭl chă năm tơgŭm ‘mêm mơnat lơ̆m kơplăh chă yơ yak, mă loi ‘noh klĕch dôm hơnih teh hơlih, gơng đak blai krê hơmơt. Mưh gre chơ tơmam truh tơ̆ xăh, khŭl lĭnh kon pơlei, đoàn viên păng kon pơlei vang pŭ tơmam mơ̆t tơ̆ rim pơlei đei tơklăh hơdrô̆.

Dêh char Khánh Hòa hlôi tơbăt hơdăh 48 hơnih sơng iŏk klăih song tơmam dŏng tơgŭm tơ̆ rim xăh. Dôm  khŭl chă năm tơgŭm ‘mêm mơnat đei athei pơma dơnuh hơdrol vă kơ băt kơtơ̆ng ang, jang hơdai klăih song tơmam tơgop kơdih. Dôm anih jang kơpal kŭm pơtho tơtă kơ kon pơlei păng dôm khŭl chă năm tơgŭm ‘mêm mơnat kăl kơchăng tơ̆ hơnăp dôm nơ̆r krao hơvơn ưh kơ rơđăh, veh ver lê̆ bơngai kơnê̆ iŏk yua jơhngơ̆m đon ‘lơ̆ng vă pơyua ăn kơdih.