Tơngăm, dăp đon dăp bơnôh tơgŭm bơngai hin dơnuh jing tơdrong mơn ƀôh đơ̆ng lơ kon pơlei tơ̆ pơlei Kram, xăh Ea Tiêu, apŭng Čư̆ Kuin, dêh char Dak Lak ƀơ̆t tơroi kơ yă H’Bliăk Niê (Amĭ Bơ̆ng). Xơ̆ jang Phŏ Kơdră Anih vei lăng kon pơlei apŭng Čư̆ Kuin, ăh pơdơh hưu, yă H’Bliăk Niê đei kon pơlei lui yom pôk jang bơngai đei kơdrưh kơ pơlei Kram. Yă hăt hot vang jang tơdrong jang chă xek tơlang pơ-‘lơ̆ng tơ̆ tơring, tơgop kơhret tơdrong tơguăt tơguăl pơlei pơla. Yă H’Bliăk Niê tơroi: “Inh hơnơ̆ng năm hadoi hăm đe kơdră thôn chă hơvơn pơtho kon pơlei pơ ‘nam pơm jang vă hơtŏk mŭk drăm. Băt trong vei lăng tơm kơsu, ka phê, rong rơmo, nhŭng vă đei xa yua, rong kon hơ-ioh hŏk pơhrăm truh tôm. Thoi noh pơtơm đei tơdrong erih tơnŏ anô̆ anăp kơnh. Mă 2 inh atŭm jơhngơ̆m hăm xăh, thôn pơlei tơtă ăn kon pơlei băt vei răk tơƀăk mong um ai joh ayŏ kon kông po nhen pơdreh chĭng chêng, dôm khôi et xa gĭt kơ hơdrung kon pơlei, ming pơ-‘lơ̆ng vă kon xâu băt truh tơdrong kăp gĭt noh kơ hơdrung hơdrĕch po”

Truh dang ei, xăh Ea Tiêu hlôi đei jơnei pơkăp tơring pơxĕl ‘nao. Tơdrong iŏk yua kơ rim ‘nu bơngai jang ăh xơnăm 2022 đei jê̆  45 rơtuh hlj. Anih jang âu to đei ming man kơjăp, trong nơnăm tơ̆ pơlei pơla đei rei kơsu ‘lơ̆ng. Lơ̆m xăh đei 14 hnam chă pơyơ̆ng tơ̆ thôn păng 7 tŏ hnam akŏm hŏk hôp tơ̆ pơlei. Kĕ đei jơnei âu, atŭm hăm dôm jăl pơgơ̆r tơring, jơnŭm tơpôl đơ̆ng apŭng truh tơ̆ xăh, đei tơdrong tơgop đơ̆ng dôm bơngai nhen yă H‘Bliăk Niê hơnơ̆ng jang tơnăp tơdrong tơroi pơtho kon pơlei hlôh vao hơdăh tơchơ̆t kăp gĭt kơ tơdrong pơjing tơring pơxĕl ‘nao. Mă lei, tơdrong mă yă H’Bliăk Niê oei pơngơ̆t kơ đon noh um ai joh ayŏ tŏk bŏk oei jê̆ hiơt hiong: “Inh ƀôh đei dôm tơdrong tơnap tap noh, tơdrong erih dang ei pha hăm xơ̆ ki, dang ei tơdrong erih mŭk drăm hơtŏk hloh, mă lei lơ bơngai lê̆ hiơt joh ayŏ mă yă ƀok pơxư̆ ăn xơ̆ ki. ‘Nguaih kơ tơdrong adrin pơm jang oei tam mă kơjăp, duh oei minh ƀar bơngai hơnơ̆ng gơnơm lơ̆m tơdrong tơgŭm đơ̆ng teh đak. Inh adrin hơvơn pơtho vă kon pơlei pơ ‘nam pơm jang, ưh đei chă kơnôm kơ đe, kơnôm lơ̆m tơdrong tơgŭm đơ̆ng bơngai nai ôh”

Jing bơngai hlôh vao tơnăp găh khôi lươ̆t, kloh klĕch găh tơdrong jang tơpôl lơ̆m lơ xơnăm, ăh chôt vih hăm pơlei pơla, yă H’Bliăk Niê hơnơ̆ng tơbăt ăn kon pơlei pơm kiơ̆ ƀlep trong pơkăp đơ̆ng Đảng, đơ̆ng teh đak. Yă ling lang tơbăt ăn kon pơlei nĕ mơ̆ng kiơ̆ nơ̆r khul kơnê̆ pơchŭt, pơdôr, tơdui, mă athei tơguăt tơguăl, băt ‘mêm tơgŭm dih băl xut lê̆ pơngot tơjur hin dơnuh: “Inh hơpơi ‘moih pơlei pơla inh đei hơtŏk tơ-iung, klaih đơ̆ng hin dơnuh, hơtŏk lơ̆m tơdrong erih, kon hơ-ioh đei hŏk pơhrăm truh tôm. Hơvơn kon pơlei nĕ kơ mơ̆ng kiơ̆ nơ̆r đe kơnê̆ tơjră hăm  Đảng teh đak, ling lang erih păng pơm kiơ̆ ƀlep lươ̆t pơkăp. Lơ̆m pơlei noh athei pơ-‘nam, tơguăt atŭm dih băl pơjing pơlei pơla pơdrŏng ‘lơ̆ng rŏ hloh”

Ƀok Hà Huy Quang, Phŏ Kơdră Anih jang găh bơngai kon kông dêh char Dak Lak ăn tơbăt, đe drăkăn đei kơdrưh lơ̆m tơpôl pơlei pơla tơgop tih tên lơ̆m tơdrong pơjing mŭk drăm – tơpôl lơ̆m tơring kon pơlei kon kông. Nơ̆r pơma kơ đe drăkăn đei kơdrưh noh kăp gĭt hloh, vă kon pơlei lui yom hloh, mơ̆ng kiơ̆ vă pơm jang tơnăp tơdrong tơlĕch hăm tôm kon pơlei tơ̆ tơring adoi nhen hơtŏk mŭk drăm tơpôl tơring kon pơlei kon kông, roi năr roi tơnăp hloh, jang đei jơnei hloh: “Dang ei khul bơngai đei kơdrưh jing đe drăkăn lơ̆m tơring kon pơlei kon kông lơ̆m dêh char noh ưh đei lơ ôh, mă lei hăm dôm tơdrong kăp gĭt kơ dôm hơdrung bơngai kon kông tơring Tây Nguyên erih kiơ̆ khôi găh mĕ, noh nơ̆r pơma, anih dơ̆ng, xơnong jang kơ đe drăkăn jing kăp gĭt hloh, mă hăt lơ̆m tơdrong pơtho kon hơ-ioh, kơtum kơtŏng, unh hnam, vei răk tơƀăk mong um ai joh ayŏ kơ hơdrung hơdrĕch. Păng tơdrong pơjing păng hơtŏk mŭk drăm tơpôl, pơjing tơdrong erih hơ iă, nơ̆r pơma, chư chih lơ̆m tơpôl kon pơlei kon kông”

Hăm tơdrong tơgop ăn pơlei pơla, yă H’Bliăk Niê chơt hơ iă đei Anih jang găh bơngai kon kông dêh char Dak Lak pôk ƀăng hmach bơnê jing bơngai kơdrưh đei tơgop kăp gĭt lơ̆m tơdrong jang tơroi hơvơn kon pơlei tơ̆ tơring kon pơlei kon kông vang jang hơtŏk mŭk drăm – tơpôl, vei xơđơ̆ng tơpôl erih xa, vei răk tơƀăk mong joh ayŏ păng tơguăt tơguăl kon pơlei.