Kiơ̆ ƀai chih đơ̆ng Anih chih tơdrong kơtơ̆ng ang teh đak Malaysia - BERNAMA, tơdrong pôk rơih đei pơgơ̆r ƀât mă Việt Nam oei hơtŏk jơphngâm hơmet pơ ‘lơ̆ng anih jang tơdrong tơgŭm vă pơyoa ăn dôm tơdrong jang tŏk gĭt kăl, đunh đai. Ƀai chih akhan, tơdrong pôk rơih ưh lăp jơnăr vă bơngai tăh hla lơ̆m teh đak bơ̆ jang hơnăp jang kơdih, chă rơih dôm bơngai tang măt rơgei, đei đon ‘lơ̆ng dơ̆ng tang ăn đon tơchĕng, tơdrong hơpơi ‘mĕh đơ̆ng kơdih lơ̆m Quốc hội păng Jơnŭm pơgơ̆r kon pơlei jơ̆p tơring lơ̆m jăl ‘nao đĕch, mă oei jing hơyak vă tơlĕch jang kiơ̆ Tơdrong tơchơ̆t đơ̆ng hop akŏm mă XIV kơ Đảng Cộng sản Việt Nam, tơklep hăm tơdrong jang kăn ƀô̆ păng hơnăp jang đơ̆ng rim anih jang kơpal.

Tơ̆ Trung Quốc, Anih chih tơdrong kơtơ̆ng ang Tân Hoa xã chih hơdăh tơdrong pơgơ̆r tih, hơiă đơ̆ng ‘măng pôk rơih, ăn tơbăt vă jê̆ 79 triu ‘nu bơngai tăh hla Việt Nam vang năm pôk rơih vă rơih iŏk 500 ‘nu bơngai tang măt Quốc hội jăl XVI, atŭm hăm ‘nŏh pôk rơih bơngai tang măt Jơnŭm pơgơ̆r kon pơlei jơ̆p tơring jăl ‘nao. Nhen thoi noh mơ̆n, kơsơ̆p Hla ar tơroi Nikkei Asia kơ Nhật Bản kŭm akhan, tơdrong pôk rơih jĭ jơnăr vă kon pơlei vang chă rơih dôm bơngai rơgei đei đon ‘lơ̆ng, dơ̆ng tang ăn tơdrong hơpơi ‘mĕh, nơ̆r pơma păng tơdrong đei yoa ăn kơdih kâu.