VOV4.Bahnar - Năr ‘nâu (22/8), hlŏh 1,9 triu ‘nu hŏk tro lăm 1 lơ̆m tĕh đak pơ tơm năm hŏk tơ̆ hnam trưng. Sơng hŏk tro năm hŏk dơ̆ng, rim hnam trưng hơ tŏk tơ drong hơ len năng tơ mam, chô̆ hơ met unh điên, hơ met đing đak, kơ ƀang tang dŏ, kung, kơ kuat điên… vă vei sơ đơ̆ng ‘lơ̆ng ăn hŏk tro, tang găn tơ drong sar bar.

Hŏk tro Hà Nội vă pơm lêh mât hŏk sơ năm hŏk ‘nao lơ̆m ‘năr 5/9

Kiơ̆ trong jang lơ̆m sơ năm hŏk 2022-2023 hăm lăm hŏk mâm non, hŏk phổ thông păng hŏk ƀô tŭk đei Anih tơm vei lăng pơ tho pơ hrăm tơ lĕch ‘năr 5/8, năr pơm lêh mât hŏk sơ năm hŏk ‘nao ‘nŏh ‘năr 5/9 nhen thoi rim sơ năm. Hŏk tro gơ̆h năm hŏk hrôih ƀiơ̆ 1 giĕng, vă akhan năm hŏk ‘năr 29/8. Hơ drô̆ lăm 1, dôm hnam trưng gơ̆h pơ gơ̆r năm hŏk hrôih ƀiơ̆ kơ năr pơm lêh mât hŏk sơ năm hŏk ‘nao 2 giĕng, jing dang ‘năr 22/8. Dôm dêh char: Hà Nam, Hải Dương, Hậu Giang, Hòa Bình, Bến Tre, Đak Nông, Đồng Tháp, Đồng Nai, Bắc Giang, Hà Nội, Bắc Kạn, Bắc Ninh, Bạc Liêu, Lai Châu, Lâm Đồng… sơng hŏk tro lăm 1 năm hŏk năr ‘nâu.

Dơ̆ng: Tơ blơ̆