Kiơ̆ kơ ‘nŏh, dêh char Khánh Hòa pơkăp tơlĕch 930 ti hlak jên lơ̆m kơsô̆ jên jang văjê̆ 1.930 ti vă pơm trong gre ‘nâu, jên oei đei dơ̆ng yoa Trung ương tơlĕch. ‘Nâu jĭ trong gre pơm klĕch, tơƀưh 3 dêh char: Khánh Hòa, Ninh Thuận păng Lâm Đồng. Tơdrong jang ‘nâu đei lơ̆m grŭp dôm tơdrong jang gĭt kăl kơ tĕh đak, akŏm đĭ đăng jên jang dang 1.930 ti. 

Jăl trong tơ ƀưh dôm dêh char Khánh Hòa, Ninh Thuận păng Lâm Đồng tôch gĭt kăl, pơih đei trong ‘nao lơ̆m tơdrong jang atŏk tơiung mŭk drăm, tơpôl tôm tơdrong, tơgŭm tơguăt rim tơring hăm dôm apŭng groi kông kơ dêh char Ninh Thuận, Lâm Đồng, pơjing tơdrong ‘lơ̆ng vă hơtŏk trong tơblăh, vei lăng sơđơ̆ng tĕh đak tơ̆ tơring găh Pơmât kơ dêh char Khánh Hòa.