VOV4.Bahnar - Năr ‘nâu 5/9, hloh 23 triệu ‘nu hŏk tro lơ̆m teh đak yak mơ̆t lơ̆m sơ năm hŏk 2022-2023 hăm hơ năn “ Tơ goăt 1 jơ hngơ̆m đon, hơ gei, tơ iung jơ hngơ̆m hơ drin jang đang ‘lơ̆ng dôm hơ năp jang păng tơ drong tơm tơ plih ‘nao, hơ met ming păng hơ tŏk ‘lơ̆ng pơ tho pơ hrăm”. Kiơ̆ kơ ƀok Kơdră tơm Nguyễn Kim Sơn, sơ năm hŏk 2022-2023 đei băt hơ dăh ‘noh jĭ sơ năm gĭt kăl tơ lĕch jang hơ năp jang tơ plih ‘nao pơ tho pơ hrăm tơ̆ jăl phô thŏng, jang kiơ̆ tơ drong jang pơ tho pơ hrăm phô thŏng 2018. Sơ năm hŏk ‘nâu, tơ drong jang pơ tho pơ hrăm phô thŏng akŏm đei tơ lĕch jang hăm lăm 3, 7 păng 10 hăm tơ plih lơ.

Thủ tướng Chính phủ Phạm Minh Chính vang pơm lêh pơ gơ̆r mơ̆t hŏk blŭng kơ Hnam trưng hŏk jăl 1 Đoàn Thị Điểm Hà Nội

Mă loi ‘noh jĭ, tơ drong pơ tho hŏk lăm 7 ‘nao ăn phep hŏk tro lăm 7 rơih kơ dih nơ̆r kon kông dăh mă nơ̆r teh đak đe 2. Tơ drong ‘nâu ăn ƀôh tơ drong vei răk nơ̆r kon kông đei lăng kăl hloi lơ̆m dôm hnam trưng hŏk. Truh dang ei, tŏ sĕt hloh 6 tơ ring lơ̆m teh đak tơ chơ̆t ưh kơ đei nôp jên ăn hŏk tro sơ năm hŏk 2022-2023 ‘noh đei: Cần Thơ, Đà Nẵng, Hải Phòng, Bà Rịa - Vũng Tàu, Bắc Kạn, Quảng Ninh. 

Thuem: Tơ blơ̆