Tơdrong thi sơnăm ‘nâu iŏk đei 3.508 ƀai thi đơ̆ng 125 anih chih hla ar tơroi. Lơ ƀai chih đei akhan chih tôch hơlen, gơ̆h hơgei, gơ̆h iŏk yoa roi tơbăt tơ̆ lơ kơmăy kơmŏk, roi tơƀôh tôch hơiă jăl trong 80 sơnăm pơjing păng jang tŏk đơ̆ng Quốc hội Việt Nam.

Khul châm hơlen đei 6 grŭp ‘nŏh: Ƀăo in, Ƀăo điên tư, Radio pơre nơ̆r, pơdăh um rup, Ƀăo rup păng Kơsơ̆p hla ar tơroi hlôi châm đang blŭng a păng rơih đei 90 ƀai hơiă hlŏh mât thi lơ̆m vŏng mă hơtuch, đei: 15 ƀai chih ăn ƀăo in, 20 ƀai chih ăn Ƀăo điên tư, 15 ƀai chih ăn kơsơ̆p hla ar tơroi, 15 ƀai chih ăn Radio pơre nơ̆r, 15 ƀai chih ăn radio pơdăh um rup păng 10 ƀai chih ăn hla ar tơroi. Dôm ƀai chih mât lơ̆m vŏng thi mă hơtuch chih tôch rơgei, hơiă, roi tơbăt tôm tơdrong jang tơm đơ̆ng Quốc hội: chih pơjing luơ̆t, dăr hơlen păng tơchơ̆t dôm tơdrong tih, gĭt kăl kơ teh đak; atŭm hăm ‘nŏh chih tơƀôh dôm tơdrong tơm lơ̆m 80 sơnăm pơjing, jang tŏk đơ̆ng Quốc hội Việt Nam.