VOV4.Bahnar - ‘Năr 12/5, Anih vei lăng tơ drong jang xa, linh jĭ rơ ka păng tơ pôl dêh char jang hơ doi hăm Anih jang đoan dêh char Kon Tum pơ gơ̆r “Năr tơ drong jang sơ năm 2022” ăn bơ ngai jang tơ̆ tơ ring.

Roi tơ ƀôh tơ drong jang ăn rim bơ ngai lơ̆m Năr tơ drong jang

Đei hlŏh 750 ‘nu bơ ngai jang, sinh viên, ƀô đô̆i vă brŏk đơ̆ng pơm linh, đoàn viên druh dăm vang akŏm. Lơ̆m kơ sô̆ âu đei 570 ‘nu bơ ngai đei dôm anih iŏk bơ ngai jang roi tơ ƀôh, apinh jet păng iŏk đei vă jê̆ 20% ‘nu bơ ngai mât jang. Lơ̆m năr, Anih pơ gơ̆r kŭm iŏk dang 60 ‘nu bơ ngai năm jang tơ̆ Bình Dương. ‘Ngoăih kơ ‘nŏh, đei 8 ‘nu bơ ngai lăp hăm tơ drong vă năm jang tơ̆ Đài Loan. 

Lơ̆m năr bơ̆ jang, đei 49 anih tĕch mơ dro, anih jang chih tơ băt ‘mĕh iŏk hlŏh 5.200 ‘nu bơ ngai jang lơ̆m dêh char, ‘ngoăih kơ dêh char păng năm jang tơ̆ tĕh đak đe kiơ̆ hla ar pơ kăp. Găh noh dơ̆ng, 2 hnam trưng Cao đẳng, anih pơ tho pơ hrăm ‘mĕh iŏk pơ tho lơ̆m sơ năm 2022- 2023 hăm hlŏh 3.000 ‘nu hŏk tro.

Dơ̆ng: Tơ blơ̆