Kiơ̆ roi tơbăt, akŏm kơsô̆ bơngai tăh hla kơ lơ̆m teh đak lơ̆m hơnăn pôk rơih ‘năr brei ‘noh: 76 triệu 516 rơbâu 637 ‘nu, lơ̆m noh kơsô̆ bơngai tăh hla hlôi vang tăh kơphiê̆u pôk ‘noh: 76 triệu 043 rơbâu 527 ‘nu (iŏk đei kơsô̆ 99,38%). Dêh char Lào Cai jĭ tơring jang pôk rơih hrôih hloh, kŭm hăm pơlei tơm Huế ‘noh 2/34 tơring iŏk đei kơsô̆ 100% bơngai tăh hla năm pôk. Mă kăl ‘noh, dêh char Lào Cai đei 173 ‘nu bơngai tăh hla đơ̆ng 100 sơnăm tơ̆ kơpal.

Kơplăh pôk rơih, dôm anih jang găh chih kơtơ̆ng ang lơ̆m teh đak păng apŭng plĕnh teh ling lang kiơ̆ hơlen păng chih tơroi tơdrong pơgơ̆r pôk rơih tơ̆ rim dêh char, pơlei tơm, rim tơring tăh kơphiê̆u. Lăng kăl roi tơbăt tơdrong pơm kiơ̆ tơdrong pôk rơih đơ̆ng dôm kơdră chĕp kơ̆l Đảng, teh đak, khŭl lĭnh ƀô̆ đô̆i, bơngai tăh hla sơnăm kră, bơngai tăh hla mơlôh ‘măng mă blŭng pơm kiơ̆ tơdrong gơh pôk rơih, bơngai kon kông, bơngai vei lăng găh lui khop, bơngai tăh hla tơ̆ tơring sơlam, đak dơsĭ, achon đak dơsĭ, tơring groi kông, rim tơring mơmat tat... Kiơ̆ đơ̆ng noh ăn ƀôh tơdrong pôk rơih đei pơgơ̆r tơpăt, ‘lơ̆ng, ƀlep tơdrong, hla ar kiơ̆ tơdrong hơgăt khôi luơ̆t; hlôh vao băt hơnăp jang păng jơhngơ̆m đon chhôk hơiă lơ̆m Năr akŏm đĭ đăng kon pơlei.