VOV4.Bahnar - ‘Năr brei (15/9), tơ̆ plt Pleiku, Hnam pơ gang Đa khoa dêh char Bình Định păng Hnam pơ gang Đa khoa dêh char Gia Lai pơm lêh kĭ pơ kăp hla ar chih tơ băt păng hla ar pơ kăp vang tơ gŭm khăm, hơ met jĭ, pơ tho tơ ƀôh khoa hŏk ki thuơ̆t găh tơ drong jang pơ gang. 

Lêh kĭ pơ kăp tơ gŭm băl khăm, hơ met jĭ đơ̆ng Hnam pơ gang Đa khoa Gia Lai păng Bình Định

Hnam pơ gang Đa khoa dêh char Gia Lai ‘nao đei tơ mât jên răt iŏk kơ măy DSA ‘nao. Kơ măy DSA iŏk yoa tia X vă phĭn huan pham lơ̆m kơ kâu jăn păng iŏk yoa dôm ki thuơ̆t ‘nao vă hơ met jĭ lơ̆m trong huan pham mă ưh kơ kăl răih. Dang ei, kơ măy DSA ‘nao âu hlôi đei chô̆ tăh tơ̆ Khoa Tim mạch, Hnam pơ gang Đa khoa dêh char Gia Lai.

Ƀok Phạm Bá Mỹ, Kơ dră chĕp kơ̆l Hnam pơ gang Đa khoa dêh char Gia Lai ăn tơ băt, tơ drong jang hơ doi vang tơ gŭm khăm, hơ met jĭ, pơ tho tơ ƀôh ki thuơ̆t đơ̆ng 2 hnam pơ gang gô tơ gŭm ăn dêh char Gia Lai đei dơ̆ng tơ drong ‘lơ̆ng jang kiơ̆ dôm ki thuơ̆t ‘nao, hơ tŏk tơ drong ‘lơ̆ng mưh khăm, hơ met jĭ ăn kon pơ lei lơ̆m dêh char pơ ma adrô̆, kon pơ lei đơ̆ng dôm dêh char jŭm dăr pơ ma atŭm, găn ƀiơ̆ tơ drong chơ bơ ngai jĭ năm tơ̆ hnam pơ gang kơ pal.

Dơ̆ng: Tơ blơ̆