Hnam trương Teh đak rong ‘me Jăl kơđeh păng ăl ƀar Buôn Đôn rơ ông rơ ang hơmet ăn sơnăm hŏk blŭng a tơ̆ pơƀng hnam trương ‘nao. Dôm rĕng lăm hŏk, hơnih hnam tep, hnam gŏ, hnam pơlong, cham đă bŏng lŏng mini… hlôi proh hơmet đang vă sơng đe hŏk tro. Hăm oh HSinh Nhị Kbuôr, hŏk tro lăm 8, tơdrong chơt hơ iă hloh đơ̆ng dang ei đei hŏk lơ̆m mĭnh hnam trương teh đak rong ‘me kơtă lơ̆m tơring hloi. Sơ̆, oh hlôi đei hơpơi ‘meh vă mơ̆t hŏk lơ̆m Hnam trương teh đak rong ‘em Kon kông dêh char Đắk Lắk tơ̆ phương Buôn Ma Thuột, mă lei jăl trong hơtăih hloh 60km păng ŭnh hnamjei tơnap tap kơna pơm ăn tơdrong hơpơi ‘meh vă ‘noh tim mă jing. Dangh ei, pơbŭng hnam trương ‘nao hlôi ba tơdrong rơvơn hŏk pơhrăm ‘noh truh tơjê̆ hnam hloh hăm oh H Sinh Nhị.“Sơnăm hŏk ‘nao ou, ĭnh mơ̆t hŏk lơ̆m hnam trương teh đak rong ‘me đei hnam tep ‘lơ̆ng liĕm, rơgoh ‘lơ̆ng, tôm tơmam drăm hăm kmăi sơngieo, koat kmăi. Oh hơrih sa tơ̆ ou tôch sơđơ̆ng. ‘Ngoăih kơ ‘noh rim lăm hŏk jei đei tôm kmăi kmŏk hloh hăm hnam trương so hơdrol ou ki. Ĭnh gô hơdrin hŏk pơhrăm, hơdrin keh đang tơdrong hơpơi ‘meh vă pơm Kŏng ang Kon pơlei.”

Hăm Buôn Si Sa Núc Lào, hơdrung Lào, lơ̆m lơ̆m ƀuôn Trí, tơring Buôn Đôn, sơnăm ou hŏk lăm 6, Hnam trương Teh đak rong ‘me Jăl kơđeh păng ăl ƀar Buôn Đôn, hnam trương ‘nao jei pơjing ăn tơdrong hŏk pơhrăm rơvơn hloh, adoi pơjing rơvơn vă oh pơhrăm tơplŏng kơdou, druh kiơ̆ jơhngơ̆m ‘meh vă.“Hnam trương ‘nao ĭnh mơ̆t hŏk đei Hnam pơlong lơ tơdrong, đei cham đă ƀŏng lŏng kơna hŏk pơhrăm tơplong kơdou tôch hơ iă. Nhôn pă đei hok pơhrăm ƀơ̆t cham teh tơ̆ ‘ngoăih ‘năr tŏ hơhlĕng nhen sơ̆ bơih. Rim kơsơ̆ ‘noh gơh chă đă ƀŏng lŏng hăm bôl boăl mă lei hoei tơtăm chă pơ̆k jĭ nhen cham teh tơjê̆ hnam. Ba jei hơdrin hŏk pơhrăm mă gơh. Ĭnh hơpơi ‘meh vă pơm bơngai đă ƀŏng lŏng păng gô hơdrin vă đei tơpă.”

Dôm tơdrong tơplih ‘noh tôch gĭt kăl tơ̆ Buôn Đôn, mĭnh lơ̆m 4 tơring sơlam teh đak tơ̆ groi teh kơ dêh char Đắk Lắk. Tơring đei vă jê̆ 6.700 ‘nu bơngai, măt bơngai kon kông tơmơ̆t 75%. Sơnăm hŏk 2026-2027, Hnam trương Teh đak rong ‘me Jăl kơđeh păng ăl ƀar Buôn Đôn đei 1.138 ‘nu hŏk tro đơ̆ng lăm 1 truh lăm 9. Đĭ đăng hŏk tro hŏk pơhrăm lơ̆m hnam trương păng sơng iŏk đei tơdrong tơgum djru kiơ̆ tơdrong tơchơ̆t nhen kơsơ̆p hla bơar hŏk, sŏng sa, oei sa, hơbĕn ao, khăn, kơmŭng, giơng sơkok.

Hnam trương atŏk tơ iung pơtho pơhrăm lăng truh atŏk tơ iung jơhngơm đon ‘lơ̆ng, tơdrong hlă kơ đe hŏk tro. Hăm hŏk tro kon kông oei lơ̆m tơring oei ƀĕnh ƀang tơnap tap, trong tơlĕch jang ou ưh khan lăp pơm hơtŏk măt bơngai hŏk mă oei tơgŭm ăn rim đe oh đei jơhngơ̆m đon gơh hơgei, oei sa ‘lơ̆ng păng  kĕ nĭt, joăt hăm tơdrong hŏk pơhrăm hle.

Kiơ̆ đơ̆ng yă Phạm Thị Loan, Kơ iĕng Kơdră chĕp pơgơ̆r hnam trương, kơ yuơ sơnăm blŭng a tơmơ̆t jang, hnam trương hơmet ăn tôm tong đơ̆ng hnam trương hŏk pơhrăm truh tơ iung pơjing trong pơtho pơhrăm păng vei lăng năng tông hŏk tro trŏ lăp hăm tơdrong pơgơ̆r oei kơtă rim jăl.“Sơđơ̆ng ăn bơ̆ jang pơtho păng hŏk iŏk đei jơnei kơtang, hnam trương hlôi proh hơmet keh đang rim tơdrong pơgơ̆r ƀar păh rim kâp hŏk vă sơđơ̆ng kơjăp pơđĭ hŏk chư păng pơhrăm jơhngơm jăn kơ hok tro. Găh tơdrong bơ̆ jang vei lăng oei sa kơ ‘năr dơ̆ng, oei sa kơtă, hnam trương jei hlôi tơlĕch hrôih đơ̆ng năr blŭng sơnăm hŏk hloi vă rim ƀok thây kô, bơngai jang băt hơdăh trong tơlĕch jang, hơmet pơ ‘lơ̆ng jơhnơ̆m đon vei lăng năng tông hok tro oei sa kơ ‘năr dơ̆ng, oei sa kơtă.”

Hnam trương ‘nao, trong pơtho pơhrăm hle jei tơlĕch ăn lơ trong’nao hăm ƀok thây kô pơtho. Vă jê̆ 60 ‘nu ƀok thây kô pơtho kơ hnam trương hlôi vangnăm hŏk pơhrăm lăm pơtho ming pơtho pơhrăm jăl ƀar pêng 2018, adoi pơm joăt hăm kmăi kmŏk hle đei răt ăn rim lăm hŏk. Hăm kô Phan Thúy Hằng, kô pơtho nơ̆r Anh, kmăi kmŏk pơdăh ăn pơtho pơhrăm ưh khan lăp pơm ăn lăm hŏk sơđơ̆ng hloh mă oei pơih dơ̆ng trong pơtho pơhrăm hơ iă.“Pơtho nơ̆r Anh lơ̆m hơnih ‘lơ̆ng đei kmăi kmŏk hle păng kmăi pơm rơngơp, ‘nou jĭ tơdrong hơ iă hloh vă ba iok yoa kmăi kmŏk, pơgơ̆r ăn chă mơ̆ng-pơma, tơdrong pơchơt păng pơma dơnuh dih băl hơ iă hloh, tơgŭm ăn hŏk tro chă hok hoei kơ hăl, chơt hơ iă păng nŏng hloh dơ̆ng lơ̆m hŏk pơhrăm. Ba jei hlôh vao lơ lou ‘nou jĭ tơdrong rơvơn, hơnăp jang vă kơdih ba tơplih ‘nao trong pơtho, iŏk yoa ‘lơ̆ng kmăi kmŏk vă pơm hơtok ‘lơ̆ng pơtho pơhrăm nơ̆r Anh pơma hơdrô̆, rim môn hŏk anai pơma atŭm.”

Hăm tơdrong lăng ba đơ̆ng Đảng, Teh đak, đơ̆ng sơnăm hŏk ‘nao, hloh 1.100 ‘nu hŏk tro tơring sơlam teh đak Buôn Đôn (dêh char Đắk Lắk) đei hŏk pơhrăm, oei sa kơtă lơ̆m hnam trương ‘lơ̆ng liĕm. Ưh khan lăp pơm hơtok tơdrong rơvơn hŏk pơhrăm, hnam trương oei jing “pơbŭng hnam atŭm”, hơnih rong tơdrong hơpơi ‘meh vă, chă pơhrăm păng chông ba vă hŏk tro đei jơhngơ̆m đon chơ̆n, lui kơjăp tơ̆ hơnăp găh tơgop jơhngơm tơ iung pơjing pơlei pơla, vei lăng sơlam kơ Teh đak.