VOV4.Bahnar -Vih sơng Têt kŭm hăm ŭnh hnam đơ̆ng dêh char Bình Dương, mŏ Y Ngọc, hnam oei tơ̆ plei Đăk Rơ Đe, xăh Ngọc Bay, pơ lei tơm Kon Tum, dêh char Kon Tum hơ nhăk ba lơ đon chiôk hơ iă. Hơ dai mĕ păng đe ‘nhŏng hơ met ăn hla, chơ lak vă nŭng ƀĕng hai sư chơt hơ iă vang tơ roi tơ drong chiôk hơ iă đơ̆ng kơ dih hăm rim bơ ngai hai. Kiơ̆ kơ sư chiôk hơ iă hloh ‘noh vei lăng đei jơ hngơ̆m pran păng sơ đơ̆ng tơ̆ hơ năp jĭ hơ buh COVID-19. Chhôk hơ iă dơ̆ng ‘noh jĭ jang kŏng nhân lơ̆m Bình Dương jên khei sơ đơ̆ng đơ̆ng 9 truh 12 triệu hlak jên, tơ drong sŏng sa rim năr găh lơ yua đơ̆ng kŏng ti bơ ngơ̆t kơ na sư kŭm chă pơ đom đei jên hơ nhăk vih tơ gŭm mĕ sư. Tơ drong chhôk hơ iă tih hloh ‘noh jĭ năr vih sa têt sơ năm ‘nâu Y Ngọc oei chông ba hloi A Nghen, bơ ngai jang hơ dai lơ̆m Kŏng ti vih tơ ƀôh muh măt ŭnh hnam hăm tơ chĕng vă pơ gơ̆r iŏk ŭnh om ƀlep năr sơ năm ‘nao. Mơ̆t hơ dai hăm tơ drong chhôk hơ iă hơ met ăn sơng Têt kơ ŭnh hnam păng kon pơ lei plei Đăk Rơ Đe, mŏ Y Ngọc tơ băt: 

“Tơ dăh chĭu mơ mat hơ drin jang đunh lơ̆m kŏng ti ‘noh jên khei ĭnh gô roi ‘năr roi tŏk dơ̆ng, sŏng sa ‘noh kŏng ti bơ ngơ̆t bơ̆ih. Năm jang prăt năr, tơ̆ gơ măng tơ dăh đei jang dơ̆ng ‘noh kŭm đei dơ̆ng iŏk yua. Sơ năm âu ki, ĭnh hlôi pơ đom đei jên lơ, đei jên vă răt tơ mam chơt hơ iă sơng sa Têt sơ năm ‘nao. Đơ̆ng rŏng Têt ‘noh ĭnh gô hơ nơ̆ng năm jang, tơ dăh jĭ hơ buh tơ̆ ei oei mơ mat tat ‘noh tơ chă tơ drong jang lơ̆m dêh char, iŏk kơ đei tơ drong jang đĕch, đei iŏk yua vă đei tơ drong arih sa sơ đơ̆ng ƀiơ̆”.

Hăm kon pơ lei Rađe tơ̆ apŭng Krông Ana, dêh char Dak Lak, hơ met ăn năr Têt ‘nŏh jĭ tơ drong jang ưh đei hiơt, yoa bu bu kŭm hơ mĕng sơ năm ‘nao hơ nhăk ba lơ tơ drong hơ iă ƀiơ̆. Yă H’Ñê Niê tơ̆ Buôn Kla, xăh Dray Sap, apŭng Krông Ana, dêh char Dak Lak tơ roi:

 “Sơ̆ mưh mât lơ̆m khei 2 đe kŏh xa kơ pô, rơ mo, chă sơng tơ moi đơ̆ng jơ̆p tơ ring truh ngôi tơ̆ pơ lei. Hrei ‘nâu Têt truh kon pơ lei nhôn hơ met ăn năr têt nhen tơ mam xa, puih hơ met cham hnam vă sơng đe truh ngôi ƀât Têt, ƀât blŭng sơnăm ‘nao. Lơ̆m sơ năm ‘nao hơ pơi ‘mĕh đei jơ hngâm pran, đei năm ngôi tơ̆ kôn mon kon sâu, vang ngôi pơ chơt hăm tơ pôl.” 

Têt truh pơ yan puih mak vih, jĭ sơ năm mơ lôh, ‘nhŏng Hyim oei tơ̆ plei Kon Brung, xăh A Yun, apŭng Mang Yang, dêh char Gia Lai ‘meh vă jơ năr mă chơt hơ iă ‘lơ̆ng. Kiơ̆ kơ ‘noh, Hyim hlôi hơ met ăn kon jên răt 1,2 blăh ao ‘nao ăn ŭnh hnam, ƀĕng keo, tơ mam sa păng pơ kao têt vă pơ rŏ lơ̆m hnam.

“Sơng têt ‘noh kŭm đei hơ met ăn tŏ tơ mam. Păng lơ̆m năr sơ năm ‘nao ‘noh ŭnh hnam kŭm pơ ma dơ nuh hăm băl găh trong jang sa vă đei iŏk yua, răt bơ̆n hơ băn ao ăn kơ kon hơ ‘lơ̆p, răt tơ mam yua ăn ŭnh hnam, nhen tơ mam sa, đak nhă, ‘nhĕm, ka....vă năr Têt đei chơt hơ iă”.

Hơ met têt ăn unh hnam kơ dih, mă lei oei tơ gĕch hơ met têt ăn kơ tơ pôl hai. ‘Nŏh jĭ trong jang đơ̆ng dôm bơ ngai pơ tăm ‘nhot tơ̆ apŭng Đơn Dương, dêh char Lâm Đồng. Pơ yan ‘nhot têt sơ năm ‘nâu đei kơ jă, đei măh mai, kơ na rim hnam kŭm đei dơ̆ng kon jên vă răt hơ met tơ mam yoa kăl vă sơng pơ yan puih mak ‘nao. Ƀok K’Điếp, tơ̆ xăh Lạc Lâm, apŭng Đơn Dương, dêh char Lâm Đồng, tơ roi:

            “Unh hnam nhôn pơ tăm ‘nhot pơm tơ mam hăm kơ măy ‘nao lơ̆m hnam kơ mĭl, hnam kơ lư̆i vă tĕch ƀât têt. Tơ drong pơ tăm ‘nhot đei yoa, rơ gŏh ‘lơ̆ng ‘nŏh gơ nơm inh vang akŏm lơ̆m dôm ‘măng hop akŏm, gơ nơm đe kăn ƀô̆ pơ tho ăn ki thuơ̆t, đơ̆ng nŏh inh băt pơ tăm ‘nhot kiơ, săy phŏng kiơ vă lăp, đei yoa. Gơ nơm thoi nŏh, pơ gar ‘nhot jing ‘lơ̆ng, đei yoa lơ, tĕch ƀônh hlot yoa đei lơ bơ ngai ‘mĕh răt, hơ nhăk iŏk yoa sơ đơ̆ng ăn unh hnam ƀât têt”.

Thuem hăm Dơ̆ng: Tơ blơ̆ păng pơ re nơ̆r