VOV4.Bahnar - ‘Nao âu, tơ̆ Hà Nội, Khul kơ dră chĕp kơ̆l Trung ương Đảng cộng sản Việt Nam, Kuô̆k hô̆i, Kơ dră tĕh đak, Khul kơ dră tĕh đak, Anih Trung ương Mặt trận Tổ quốc Việt Nam pơm lêh tih tơ băt 60 sơ năm Năr pơ jing tơ drong pơ vei jang tơ bôl păng 45 sơ năm Năr kĭ Hla ar pơm tơ bôl păng jang hơ doi Việt Nam-Lào.

Pơ đou dơ̆ng tơ drong pơ vei jang tơ bôl kăp gĭt đơ̆ng Đảng, tĕh đak păng kon pơ lei 2 tĕh đak Việt Nam – Lào, Tổng Bí thư Nguyễn Phú Trọng pơ ma hơ dăh, hăm tơ drong chĕp kơ̆l pơ gơ̆r đơ̆ng Đảng Cộng sản Việt Nam păng Đảng Kon pơ lei kăch mang Lào, kon pơ lei 2 tĕh đak yak hơ doi đơ̆ng dôm năr blŭng ƀĕnh tơ drong nol, gleh hrat, mơ mat tat vă vei lăng păng tơ iung pơ jing Tĕh đak xã hội chủ nghĩa tơ̆ rim tĕh đak. 2 Đảng, 2 tĕh đak tơ gŭm băl dar dĕh jang tưk tơ iung mŭk drăm, tơ pôl đơ̆ng rŏng kơ tơ blăh, atŭm hăm ‘nŏh dar dĕh pơ jing păng atŏk tơ iung tơ drong pơ vei jang hơ doi lơ̆m rim tơ drong gĭt kăl găh mŭk drăm, joh ayŏ kơ dŏ xoang, tơ pôl, pơ tho pơ hrăm, khul linh vei lăng sơ đơ̆ng păng jang tơ bôl.

Tổng Bí thư Nguyễn Phú Trọng pơ ma hơ dăh, hăm tơ drong tơ ƀôh trong chong glung đơ̆ng Chủ nghĩa Mác-Lênin, đon tơ chĕng Hồ Chí Minh tơ̆ Việt Nam păng đon tơ chĕng Cay-xỏn Phôm-vi-hản tơ̆ Lào, 2 Đảng, 2 tĕh đak hơ nơ̆ng năm hơ doi hăm băl lơ̆m tơ drong jang tơ plih ‘nao, kŭm iŏk đei lơ tơ drong jơ nei tih tên lơ̆m tơ drong jang atŏk tơ iung mŭk drăm, tơ pôl, vei kơ jăp chinh trĭ, tơ drong sơ đơ̆ng lơ̆m tơ pôl, hơ nhăk ba tơ drong arih xa roi đunh roi phĭ tơ tŏ dơ nŏ ‘lơ̆ng păng hiôk sơ đơ̆ng ăn kon pơ lei tơ̆ 2 tĕh đak.

“Năng dơ̆ng jăl trong lơ̆m jơ hnơr arih kơ tang nuih mơng mă 2 hơ drĕch hơ drung hlôi yak hlŏh, bơ̆n gơ̆h hơ iă, hưch hanh găh tơ drong pơ vei tôch ‘lơ̆ng, tôch hơ iă, mĭnh ƀơ̆r đon hăm băl đơ̆ng 2 Đảng, 2 tĕh đak păng kon pơ lei 2 tĕh đak Việt Nam păng Lào. Tơ drong pơ vei gĭt kăl Việt - Lào hlôi đei dôm kơ dră chĕp kơ̆l gơ̆h hơ gei, ‘mêm kơ eng ‘nŏh jĭ Ƀok Hô, Ƀok Kơ dră Cay-xỏn Phôm-vi-hản păng ƀok Kơ dră Xu-pha-nu-vông pơ jing blŭng a; hơ nơ̆ng đei hŭt jơ hngâm tơ iung pơ jing, vei lăng tưk hơ tŏk hăm đak pơ uh pơ ang, hăm kơ sư̆k păng jô̆ hloi sĕch kar đơ̆ng rim jơ hnơr khul linh păng kon pơ lei 2 tĕh đak; tơ pă jing tơ mam tôch kăp gĭt, tơ drong pơ vei "đei 1 ưh đei ƀai" lơ̆m jơ hnơr arih kơ apŭng plenh tĕh”.

Tổng bí thư Nguyễn Phú Trọng pơ ma lơ̆m jơ pơm lêh

Kiơ̆ Tổng Bí thư Nguyễn Phú Trọng tơ drong pơ vei jang hơ doi đơ̆ng 2 Đảng, 2 tĕh đak Việt Nam păng Lào hơ nơ̆ng tŏk pran kơ jăp, roi đunh roi ‘lơ̆ng hơ iă păng đei yoa, mă loi jĭ tơ drong pơ vei Chinh trĭ hơ nơ̆ng đei hơ met kơ jăp păng roi tŏk ‘lơ̆ng, đơ̆ng "pơ vei tơ bôl juăt jue" jing "pơ vei tơ bôl tih kăp gĭt" iŏk đơ̆ng khei 02/2019, roi đunh roi kơ jăp, roi lui băl, hơ nơ̆ng tơ gŭm tơ ƀôh trong chong glung ăn dôm tơ drong jang hơ doi nai; Jang hơ doi khul linh vei sơ đơ̆ng tĕh đak hơ nơ̆ng jing 1 lơ̆m dôm tơ drong jang tơm gĭt kăl hlŏh lơ̆m tơ drong pơ vei gĭt kăl đơ̆ng 2 tĕh đak. Jang hơ doi mŭk drăm hơ nơ̆ng đei tơ rĕk truh, tưk tơ iung păng hlôi iŏk đei lơ tơ drong jơ nei ‘lơ̆ng, hơ nhăk ba tơ drong đei yoa tơ pă ăn kon pơ lei păng anih tĕch mơ dro kơ 2 tĕh đak; Jang hơ doi găh pơ tho pơ hrăm – tơ drong jang hơ doi đunh đai đơ̆ng 2 tĕh đak, kŭm nhen jang hơ doi găh jŏh ayŏ kơ dŏ xoang, jang pơ gang, pơm trong, chơ chuĕn, jang unh hơ yuh roi đunh roi đei hơ met kơ jăp păng tŏk pran. Tơ drong pơ vei đơ̆ng dôm tơ ring, mă loi jĭ đơ̆ng dôm dêh char sơ lam kơ 2 tĕh đak roi đunh roi kơ jăp ‘lơ̆ng.

Tổng Bí thư Nguyễn Phú Trọng oei pơ ma akhan, ƀât mă lơ̆m apŭng plenh tĕh păng tơ̆ tơ ring oei đei lơ tơ drong tơ plih tôch hrĕnh, krê hơ mơt păng ưh gơ̆h băt hơ drol; kon bơ ngai oei tơ jră hăm lơ tơ drong nol nhen tơ blăh vang, tơ jră băl, pơ jei băl roi dêh đơ̆ng dôm tĕh đak tih, dôm tơ drong ưh sơ đơ̆ng ‘nao đei nhen jĭ hơ buh, ưh kơ măh unh hơ yuh, phe ƀa tơ mam xa; 2 Đảng, 2 tĕh đak păng kon pơ lei 2 tĕh đak athei mât 1 ƀơ̆r đon kơ jăp hlŏh dơ̆ng, hơ tŏk tơ drong jang hơ doi vă kŭm hăm băl yak hlŏh rim tơ dỏng mơ mat tat, hơ nơ̆ng druh kiơ̆ tơ drong rơ ngei ăn hơ drĕch hơ drung păng chủ nghĩa xã hội; vang jang đĭ jơ hngâm vă vei lăng păng hơ nơ̆ng tưk tơ iung tơ drong pơ vei ‘lơ̆ng hơ iă, tơ guăt 1 ƀơ̆r đon kăp gĭt păng jang hơ doi tôm tơ drong Việt Nam – Lào:

“Đảng, tĕh đak păng kon pơ lei Việt Nam ling lang tơ gŭm tôch ai, tôm tơ drong tơ plih ‘nao đơ̆ng Lào; atŭm hăm ‘nŏh tôch năng kăl păng ‘măn tơ drong tơ gŭm blŭng a ăn tơ drong pơ vei gĭt kăl, boăl juăt tôch kơ jăp hai, jĭ ‘nhŏng ŏh đơ̆ng 2 Đảng, 2 tĕh đak bơ̆n hai. Nhôn hơ nơ̆ng hơ pơi ‘mĕh jang hơ doi, tơ gŭm ăn tĕh đak Lào hăm jơ hngâm đon "tơ gŭm boăl ‘nŏh jĭ tơ gŭm ăn kơ dih", năng ‘nâu jĭ tơ drong jang tôch gĭt kăl, đunh đai; hơ pơi ‘mĕh kŭm hăm Đảng, tĕh đak păng kon pơ lei Lào hơ nơ̆ng tưk tơ iung, vei kơ jăp đon lui băl găh chinh trĭ, hơ tŏk tơ drong jang hơ doi găh vei sơ đơ̆ng tĕh đak, hơ tŏk tơ drong tơ guăt 2 anih jang mŭk drăm, hơ nơ̆ng pơm pơ ‘lơ̆ng hlŏh dơ̆ng tơ drong jang hơ doi găh pơ tho pơ hrăm, kŭm hăm băl vang tơ iung pơ jing mŭk drăm kơ dih, kơ chăng, mât jang hơ doi kơ jăp ‘lơ̆ng, jrŭ xă; vang adrin vă dôm tơ drong jơ nei đơ̆ng jang hơ doi roi đunh roi tơ găl hăm tơ drong pơ vei gĭt kăl Việt – Lào”.

Ƀok Bounthong Chitmany, Kơ dră jang lơ̆m Anih tơm Chinh trĭ, Phŏ Kơ dră tĕh đak CHDCND  Lào iung pơ ma

Pơ ma lơ̆m jơ pơm lêh, ƀok Chitmany, Kơ dră jang lơ̆m Anih tơm Chinh trĭ, Kơ dră chĕp kơ̆l Ban Bí thư Trung ương Đảng Kon pơ lei kăch mang Lào, Phŏ Kơ dră tĕh đak Cộng hòa dân chủ Nhân dân Lào pơ ma hơ dăh, Đảng, tĕh đak păng kon pơ lei Lào hơ nơ̆ng chĕp răk lơ̆m jơ hngâm păng băt bơ nê tôch dêh hăm Ƀok Hô, hăm ƀok Kơ dră Kay-sỏn Phôm-vi-hản păng ƀok Kơ dră Xu-pha-nu-vông ‘mêm kơ eng jĭ bơ ngai hloi pơ jing păng đei jơ hngâm đon tôch ‘lơ̆ng vang vei lăng, tưk tơ iung tơ drong tơ bôl tih, tơ drong pơ vei tôch kăp gĭt păng jang hơ doi tôm tơ drong đơ̆ng 2 tĕh đak Việt Nam-Lào, jing tơ mam hơ dai tôch kăp gĭt, jĭ tơ drong arih păng jang tŏk đơ̆ng 2 tĕh đak, jĭ mĭnh lơ̆m dôm tơ drong kăl hlŏh pơm ăn tơ drong jang kăch mang gơ̆h iŏk jơ nei tơ̆ rim tĕh đak.

“Đảng, Tĕh đak păng kon pơ lei Lào nhôn hơ nơ̆ng chĕp vei kơ jăp păng năng ‘nâu jĭ hơ năp jang đơ̆ng nhôn lơ̆m tơ drong atŏk tơ iung tơ drong juăt ‘lơ̆ng đơ̆ng tơ drong pơ vei tih, tơ guăt ƀơ̆r đon gĭt kăl păng jang hơ doi tôm tơ drong Lào-Việt Nam hlôi yak hlŏh kơ băt dôm yơ tơ drong nol păng tuh kơ sư̆k tơ iung pơ jing hăm đak pơ uh, sĕch pham đơ̆ng đe linh kơ tang nuih mơng kŭm nhen kon pơ lei Lào păng kon pơ lei Việt Nam rim jơ hnơr vă gơ̆h ling lang chĕp vei kơ jăp, đei hơ nơ̆ng hơ nong; hơ nhăk tơ drong đei yoa tơ pă, ‘lơ̆ng hlŏh ăn kon pơ lei 2 tĕh đak, vă tơ găl hăm nơ̆r pơ đơ̆k ưh đei lai yơ hiong hiong đơ̆ng ƀok Kơ dră Kay-sỏn Phôm-vi-hản: “Kông gơ̆h hơ lih hach, đak krong gơ̆h hrơ̆, mă lei tơ drong ‘mêm băl đơ̆ng Lào – Việt Nam ling lang đei kơ jăp hlŏh kơ kông, hlŏh kơ đak krong”.

        Păng nhen nơ̆r pơ đơ̆k ưh đei lai yơ hiong hiong đơ̆ng Ƀok Hô: 

        “ ‘Mêm băl dôm tŏ kông kŭm tŏk

        Dôm tŏ đak krong kŭm glơi, dôm tŏ krang kŭm yak hlŏh

        Việt-Lào 2 tĕh đak bơ̆n

        Jơ hngâm ‘mêm băl jrŭ hlŏh kơ đak Hồng Hà-Cửu Long”

Dơ̆ng: Tơ blơ̆