VOV4.Bahnar - Bơ̆ jang hơ lơ̆k dơ̆ng đơ̆ng rŏng dôm năr pơ dơh têt nguyên đán, rim ngê̆ si, bơ ngai hơ ri hơ soang kơ khŭl hơ ri hơ soang kon kông dêh char Dak Lak ‘noh hăt hot hăm năr pơ hrăm ăn dôm tơ drong hơ ri hơ soang ‘nao. Ƀok Y Kô Niê, Phŏ kơ dră Khŭl hơ ri hơ soang kon kông dêh char Dak Lak tơ roi, ƀơ̆t hơ drol kơ têt, pơ đĭ khŭl hlôi ‘măn lơ jơ păng jơ hngơ̆m pơ hrăm ăn 2 tơ drong hơ ri hơ soang sơng sơ năm ‘nao păng gơ măng sơng sơ năm ‘nao. Pha hăm rim sơ năm, yua đơ̆ng ƀơm kơ nê̆ đơ̆ng jĭ hơ buh kơ na tơ drong hơ ri hơ soang lăp pơ gơ̆r Anih joh ayŏ dêh char păng đei pơ dăh ti vi kơ tă lơ̆m dôm kênh tivi păng Youtube.

  Đơ̆ng rŏng kơ têt, pơ đĭ khŭl gô tơ lĕch năr hơ met ăn dôm tơ drong hơ ri hơ soang tih pơ yua ăn hơ ri hơ soang tơ̆ dêh char păng năm truh tơ̆ tơ ring vă pơ yua ăn tơ pôl mưh jĭ hơ buh Covid-19 đei vei lăng. “Mă hơ drol ‘noh hơ met ăn dôm năr lêh, tơ băt kơ dêh char păng teh đak. Hơ drol kơ têt kŭm hlôi bơ̆ jang bơ̆ih păng dang ei têt đang ‘noh hơ nơ̆ng tơ lĕch jang. Tơ dăh mưh jĭ hơ buh ưh kơ gơh tơ lĕch jang ‘noh gô kuey phim dôm ƀai hơ ri hơ soang păng pơ̆ih lăm  ti vi, internet, mạng tơ pôl kiơ̆ kênh kơ anih jang vă rim kon pơ lei păng pơ đĭ hloi bôl buăl apŭng plĕnh teh gơh lăng”.

Oei tơ̆ Gia Lai, Khul chă tơ roi tơ băt kơ Khul hơ ri hơ xoang Đam San (găh Anih vei lăng jŏh ayŏ kơ dŏ xoang, tơ plŏng kơ dâu păng chă tơ mang lăng dêh char Gia Lai) kŭm năm jang hăm lơ tơ drong tơ roi tơ băt, hơ ri hơ xoang ăn kon pơ lei tơ̆ tơ ring lăng. Adrol sơ̆, rim sơ năm, Khul pơ gơ̆r kơ hrĕng ‘măng năm hơ ri hơ xoang tơ̆ dôm tơ ring hơ tăih yăih, tơ ring kon kông lơ̆m dêh char Gia Lai. Mă lei sơ năm 2021 âu ki, yoa jĭ COVID-19, ưh gơ̆h akŏm kơ drâm bơ ngai, kơ na khul tơ plih trong jang kiơ̆ đơ̆ng kuay tơ ƀôh video, hơ tŏk lơ̆m facebook, youtube kiơ̆ lơ tơ drong pha ra băl. Tơ drong ‘nâu tơ gŭm pơm ‘lơ̆ng ăn tơ drong jang păng roi tơ ƀôh hiôk hian ƀiơ̆.

Mŏ H’Blup kăn ƀô̆ lơ̆m Khul jang tơ roi tơ băt kơ Khul hơ ri hơ xoang Đam San tơ roi: “Nhôn jĭ kăn ƀô̆ joh hơ ri hơ xoang, bơ̆ jang chă roi tơ băt. Nhôn pơ gơ̆r hơ ri hơ xoang, pơm kĭch vă kon pơ lei lăng ngôi đơ̆ng rŏng 1 năr bơ̆ jang gleh hrat. Kiơ̆ đơ̆ng noh, nhôn chă tơ roi hloi dôm trong jang đơ̆ng Đảng, khôi luơ̆t tĕh đak. Kiơ̆ kơ ‘nŏh, vă kon pơ lei băt Đảng, tĕh đak tôch tơ rĕk, pơ ngơ̆t ăn tơ drong arih xa kơ kon pơ lei. Găh noh dơ̆ng, tơ roi ăn đe sơ hlôh, lê̆ pơm dôm tơ drong glăi, lê̆ pơ răm kơ dih kâu păng mih ma duch nă lơ̆m pơ lei”.

Thuem hăm Dơ̆ng: Tơ blơ̆ păng pơ re nơ̆r