VOV4.Bahnar - Lơ̆m 2 năr ‘năr 25-26/8, tơ̆ pơ lei tơm Buôn Ma Thuột, dêh char Dak Lak, Hơ nih vei lăng hơ drĕch kon kông jăl XV pơ gơ̆r ‘măng hop akŏm đĭ đăng ‘măng mă 4 vă tơ lĕch jang dôm tơ drong pơ yua ăn ‘măng hop akŏm mă 4, Kuôk hô̆i jăl XV păng set hơ len ăn tơ gop nơ̆r 1,2 tơ drong ƀơm truh Tơ drong jang tơm kơ teh đak hơ tŏk tơ iung mŭk drăm tơ pôl tơ ring kon pơ lei kon kông păng tơ ring groi kông jăl jang 2021-2030, tơ drong jang tơ plih ‘nao, hơ tŏk ‘lơ̆ng, đei yua đơ̆ng Hơ nih vei lăng hơ drĕch kon kông, pơ ma dơ nuh tơ gop nơ̆r vă hơ len lăng Luơ̆t teh ( hơ met ming).

Pơ ma pơ gơ̆r ‘măng hop akŏm, ƀok Y Thanh Hà Niê Kđăm, Kơ dră hơ nih vei lăng hơ drĕch kon kông kơ Kuôk hô̆i athei dôm bơ ngai tang măt akŏm pơ ma dơ nuh, hơ len lăng dôm jơ nei iŏk đei, tơ blang hơ dăh tơ drong tơm pơm ăn oei đei ưh kơ gan ‘lơ̆ng. Đơ̆ng noh tơ lĕch ăn trong jang vă bơ̆ jang kiơ̆ ‘lơ̆ng hloh dơ̆ng dôm hơ năp jang hlôi tơ lĕch ăn. Lơ̆m noh, bơ ngơ̆t truh dôm tơ drong jang tơm kơ teh đak hơ tŏk tơ iung mŭk drăm tơ pôl tơ ring kon pơ lei kon kông - tơ ring groi kông.

Thuem: Tơ blơ̆