VOV4.Bahnar - ‘Năr brei (5/8), tơ̆ pơ lei tơm Đà Lạt (Lâm Đồng), Khŭl bơ ngai chih hla ar tơ roi Việt Nam pơ gơ̆r hop akŏm pơ tôch tơ drong jang tơ gŭm ƀai chih kơ tơ̆ng ang hơ gei ‘lơ̆ng jăl jang 2016-2020, tơ lĕch jang tơ drong jang tơ gŭm jăl jang 2021-2025. Vă jê̆ 150 ‘nu bơ ngai tang măt ‘noh bơ ngai jang lơ̆m khŭl, kơ dră chĕp kơ̆l rim Khŭl bơ ngai chih hla ar tơ roi 19 dêh char, pơ lei tơm tơ ring Tŏk bŏk - Tây Nguyên năm akŏm.

Vă hơ nơ̆ng jang kiơ̆ đei iŏk yua tơ drong jang tơ gŭm ƀai chih kơ tơ̆ng ang hơ gei ‘lơ̆ng jăl jang 2021-2025 kiơ̆ tơ drong tơ chơ̆t 558 đơ̆ng Thủ tướng teh đak, hop akŏm hlôi ‘măn lơ jơ pơ ma dơ nuh, tơ blang hơ dăh păng tơ roi lơ nơ̆r tơ gop găh tơ drong jang đei pơ trŭt păng tơ drong lăp hăm hơ nih bơ̆ jang; tơ gŭm lơ̆m tơ drong hơ met ming tơ drong joăt jang, hơ tŏk ‘lơ̆ng tơ drong jang ăn dôm bơ ngai chih hla ar tơ roi lơ̆m kơ plăh bơ̆ jang; hơ tŏk ‘lơ̆ng ƀai chih đơ̆ng anih jang chih kơ tơ̆ng ang. Pơ ma tơ̆ hop akŏm, ƀok Nguyễn Đức Lợi, Phŏ Kơ dră chĕp kơ̆l Khŭl bơ ngai chih hla ar tơ roi Việt Nam pơ ma hơ dăh, tơ drong jang hơ nơ̆ng tŭn pran tơ drong jang tơ gŭm hla ar chih kơ tơ̆ng ang hăm kon jên tih hloh, lơ̆m noh akŏm hơ tŏk ‘lơ̆ng tơ drong bơ̆ jang hơ gei đơ̆ng dôm bơ ngai jang lơ̆m khŭl.

Thuem: Tơ blơ̆