VOV4.Bahnar - Tơ̆ plt Buôn Ma Thuột, dêh char Dak Lak, Anih pơ gơ̆r tơ drong thi Chĕh phe ‘lơ̆ng kơ Việt Nam 2022 pơm lêh hơ păh tơ mam ăn Chĕh phe ‘lơ̆ng Việt Nam ăn dôm anih jang đei tơ mam hlŏh 80 điêm kiơ̆ điêm đei asong ăn chĕh phe ‘lơ̆ng kơ apŭng plenh tĕh. Hăm tơ mam chĕh phe Robusta, top 1 găh HTX Ea Tân (dêh char Dak Lak), top 2 găh Công ty TNHH MTV Minudo Farm- Care (dêh char Dak Lak), top 3 ‘nŏh Pơ gar jang chĕh phe đum Ea Tân (dêh char Dak Lak).

Hơ păh tơ mam ăn Chĕh phe ‘lơ̆ng

Hăm tơ mam chĕh phe Arabica, top 1 jei kơ Công ty TNHH MTV Minudo Farm- Care (dêh char Dak Lak), top 2 ‘nŏh công ty jang hơ doi tĕch mơ dro, tơ mât jên jang Dathaco (Plt Hồ Chí Minh), top 3 ‘nŏh công ty TNHH Pun Coffee (dêh char Quảng Trị). ‘Nâu jĭ ‘măng mă 4 tơ drong thi chĕh phe ‘lơ̆ng Việt Nam đei pơ gơ̆r. Tơ drong thi vă pôk pơ ư dôm bơ ngai pơ tăm chĕh phe, tơ mam chĕh phe ‘lơ̆ng păng anih jang chĕh phe iŏk đei nơ̆r hơ găt ‘lơ̆ng; roi tơ băt tơ mam chĕh phe găr ‘lơ̆ng đơ̆ng Việt Nam truh hăm bơ ngai răt yoa, hnam kơ măy hơ drĕng lơ̆m păng ‘ngoăih kơ tĕh đak.

Dơ̆ng: Tơ blơ̆