VOV4.Bahnar - Oei lơ̆m dôm tơ drong jang tơ băt 30 sơ năm pơ jing tơ drong pơ vei jang tơ bôl Việt Nam – Hàn Quốc, kơ sơ̆ ‘năr 25/3 tơ̆ pơ lei tơm Sầm Sơn, dêh char Thanh Hoá pơ gơ̆r Hop akŏm “ Tơ ƀơ̆p Hàn Quốc”. Hàn Quốc dang ei tŏk bŏk vei anih dơ̆ng ‘noh jĭ anih tơ mơ̆t jên jang tih hloh lơ̆m Việt Nam hăm 9.200 tơ drong jang oei tơ mơ̆t jang; jang hơ dai ODA, tơ mang lăng, bơ ngai jang tih hloh mă 2 păng jang hơ dai mơ dro sa mă 3 hăm jên mơ dro sa 2 pang đei 78 ti USD lơ̆m sơ năm 2021. Pơ ma tơ̆ Hop akŏm, Phŏ kơ dră Anih tơm jang tơ bôl Việt Nam Nguyễn Minh Vũ ‘meh vă lơ tơ ring păng anih jang mơ dro gô tơ chă đei anih jang hơ dai mă lăp, lơ đon tơ chĕng jang hơ dai vă iŏk đei tơ drong hơ găt hơ drin hơ tŏk jên mơ dro sa 2 pang Việt Nam-Hàn Quốc tŏk 100 ti USD lơ̆m sơ năm 2023 păng yak truh tơ drong hơgăt đei 150 ti USD lơ̆m sơ năm 2030. Khŭl kơ dră teh đak Việt Nam pơ kăp tơ gŭm hơ drol bơ ngơ̆t truh ‘noh jĭ tơ plih rơ goh ‘lơ̆ng, tơ plih kơ sô̆... păng ‘nâu jing tơ drong pran đơ̆ng rim anih jang mơ dro sa Hàn Quốc.

Thuem: Tơ blơ̆