VOV4.Bahnar - Giĕng âu ki, Trung ương Đoàn hơ druh tơ dăm Cộng sản Hồ Chính minh hlôi pơ gơ̆r pơ tôch tơ drong jang Khei hơ druh tơ dăm sơ năm 2022. Hăm hơ năn “ Sơ năm mơ lôh hơ gei”, bơ̆ jang Khei hơ druh tơ dăm sơ năm 2022 hlôi đei rim kơ dră đoàn tơ lĕch jang jrŭ să, sơng đei lơ lap đoàn viên, hơ druh tơ dăm hơ ioh hơ drin vang jang. Lơ trong jang ‘nao, hơ gei lơ̆m pơ gơ̆r rim tơ drong jang, bơ̆ jang tơ lĕch jang lơ̆m Khei bơ̆ jang đei vang tơ gŭm, ơ̆ih să tơ tom, đei yua lơ̆m đĭ đăng đoàn kiơ̆ dôm giĕng tơ lĕch jang bơ̆ jang.

Khei hơ druh tơ dăm 2022 hăm hơ năn “ Sơ năm mơ lôh hơ gei” hlôi đei 67/67 anih jang đoàn dêh char, pơ lei tơm păng anih jang đoàn tơ ring vang jang, sơng đei vă jê̆ 28.000 ‘nu đoàn viên, hơ druh tơ dăm, tơ lĕch jang lơ tơ drong jang bơ̆ jang kiơ̆ hăm akŏm jên hơ vơn vă jê̆ 68 ti hlak jên. Tơ drong jang pơ gơ̆r tơ lĕch jang dôm tơ drong jang kơ Khei hơ druh tơ dăm sơ năm 2022 đei tơ lĕch jang kiơ̆ tơ tom, ‘lơ̆ng đơ̆ng Trung ương truh tơ ring.

Rim tơ drong jang đei tơ lĕch jang hiôk lơ̆m jơ năr hơ druh tơ dăm lơ̆m teh đak chơt hơ iă pơ gơ̆r lơ tơ drong jang tơ băt 91 sơ năm Năr pơ jing Đoàn hơ druh tơ dăm Cộng sản Hồ Chí Minh, pơ gơ̆r hop akŏm Đoàn rim tơ ring yak truh Hop akŏm Đoàn lơ̆m teh đak ‘măng mă XII; jang kiơ̆ tơ drong jang pơ gơ̆r đơ̆ng Đảng, teh đak, Khŭl kơ dră teh đak găh tang găn jĭ COVID-19; tơ tom, hrĕnh vă pơ jing dôm trong jang hơ gei lơ̆m tơ lĕch bơ̆ jang, lăp hăm

đei ƀôh đơ̆ng jĭ hơ buh.

Lơ trong jang ‘nao, hơ gei lơ̆m pơ gơ̆r rim tơ drong jang, bơ̆ jang tơ lĕch jang lơ̆m khei hơ druh tơ dăm đei vang tơ gŭm, pơ̆ih să tơ tom, đei yua lơ̆m đĭ đăng đoàn kiơ̆ rim giĕng tơ lĕch bơ̆ jang. Khŭl jang đoàn viên, hơ druh tơ dăm vang jang dôm tơ drong jang lơ̆m Khei hơ druh tơ dăm lơ lap, hơ druh tơ dăm vang jang lơ ‘năi.

Lêh pơ tôch khei hơ druh tơ dăm 2022

        Hơ dai hăm pơ tôch hlôi iŏk đei, 1,2 tơ drong jang tam mă đei akŏm tơ lĕch jang, tam mă iŏk đei jơ nei kiơ̆ trong tơ lĕch jang Khei hơ druh tơ dăm sơ năm 2022, nhen: Tơ drong jang hơ dai pơ tho tơ ƀôh tơ drong jang păng hơ met pơ ‘lơ̆ng tơ drong jang ăn hơ druh tơ dăm đơ̆ng rim kơ dră Đoàn oei tam mă gan ‘lơ̆ng, tam mă đei tơ plih ‘nao lơ; tam mă đei lơ tơ drong jang đei yua lơ̆m tơ drong jang tơ gŭm tơ plih kơ sô̆, tơ mơ̆t yua kơ măy kơ mŏk ‘lơ̆m choh jang sa; tơ lĕch jang tơ drong jang sơ năm mơ lôh hơ gei năm jang tơ gŭm vang jang hơ met ming dơ̆ng tơ drong jang sa oei tam mă ‘lơ̆ng; tơ drong pơ jing, tơ lĕch jang khŭl năm jang tơ gŭm tơ mơ̆t yua kơ măy kơ mŏk rơ goh lơ̆m vei lăng cham char kŭm tam mă hơ nhăk ăn đei yua lơ.

        Tơ̆ jơ pơ tôch, lơ nơ̆r pơ ma dơ nuh đơ̆ng rim anih jang đoàn dêh char, pơ lei tơm tơ lĕch ăn dôm nơ̆r athei vă hơ tŏk ‘lơ̆ng tơ drong jang Đoàn tơ̆ hơ năp kơnh. Thiếu tá Bạch Quốc Tuyên, Phŏ Bí Thư Đoàn hơ druh tơ dăm Anih tơm vei lăng Kŏng an tơ roi nơ̆r tơ gop: Hăm tơ drong jang 5 iung jang, hơ tŏk tơ iung mŭk drăm tơ pôl, vei lăng teh đak, kăl jang hơ dai tơ drong jang hăm rim dêh char, pơ lei tơm, pơ vei đei yua tơ drong jang hơ druh tơ dăm vang jang vei lăng tơ ring sơ lam:

        “ ‘Ngoăih kơ tơ drong bơ̆n hơ nơ̆ng pơ gơ̆r khei 3 tơ ring sơ lam ‘noh bơ̆n gơh tơ chĕng hơ len gơh tơ lĕch jang tơ drong jang kơ jung hloh ƀiơ̆. Pơ tih gia, rơ̆ih iŏk sơ năm băt hơ dăh ‘noh Sơ năm hơ druh tơ dăm Việt Nam hăm tơ ring sơ lam achon đak dơ sĭ kơ lĕ, ‘noh bơ̆n akŏm đei lơ jên ƀiơ̆, lơ tơ drong jang ƀiơ̆ vang jang hơ tŏk tơ iung mŭk drăm tơ pôl tơ ring sơ lam. Mă 2, nhôn athei rim dêh char, pơ lei tơm hơ nơ̆ng jang hơ dai đei yua hăm khŭl hơ druh tơ dăm Anih tơm vei lăng Kŏng an lơ̆m pơ gơ̆r tơ drong jang găh tơ ring sơ lam, đak dơ sĭ, achon đak dơ sĭ. Nhôn ‘meh vă gô đei tơ drong jang tơ gŭm đơ̆ng Ban Bí thư Trung ương Đoàn tơ lĕch ăn tơ drong tơ chơ̆t jang hơ dai đơ̆ng Đoàn hơ druh tơ dăm Anih tơm vei lăng Kŏng an hăm rim dêh char, pơ lei tơm pơ tho bơ̆ jang đơ̆ng Đoàn hơ druh tơ dăm, Kŏng an rim dêh char, pơ lei tơm găh Trung ương kŭm nhen lơ̆m tơ drong tơ chơ̆t jang hơ dai đơ̆ng klăih song pơ gơ̆r rim tơ drong jang lơ̆m tơ ring kon pơ lei oei tơ̆ rim anih jang đoàn dêh char, pơ lei tơm.”

Hơ druh tơ dăm Dak Lak hơ drin vang jang dôm tơ drong jang vei sơ đơ̆ng tơ drong arih sa tơ pôl

          Pơ ma tơ̆ hop akŏm, ‘nhŏng Nguyễn Anh Tuấn, Bí thư mă mônh Trung ương Đoàn hơ druh tơ dăm Cộng sản Hồ Chí Minh lăng ‘lơ̆ng dôm tơ drong hơ drin păng pơ tôch mă rim anih jang đoàn dêh char, pơ lei tơm lơ̆m teh đak iŏk đei lơ̆m khei hơ druh tơ dăm, lơ̆m noh đei tơ drong chih iŏk đơ̆ng Anih tơm, anih jang Trung ương, khŭl kơ dră tơ ring, kon pơ lei, pơm tơ drong hơ iă pơ jei băl akŏm ăn tơ drong pơ gơ̆r hop akŏm đoàn rim tơ ring; lơ tơ drong mơ mat lơ̆m Khei hơ druh tơ dăm mă oei bơ̆ jang kiơ̆ đei. Mă lei, lơ tơ drong tam mă ‘lơ̆ng tam mă jang đei, oei lê̆ lon, kăl kơ lăng kiơ̆ găh jang tơ gŭm, pơ gơ̆r vei lăng. ‘Nhŏng Nguyễn Anh Tuấn athei:

“Hlôh vao đơ̆ng bơ̆n ‘lăng kiơ̆ đơ̆ng pơ gơ̆r Khei hơ druh tơ dăm ‘noh jĭ tơ drong pơ vei đơ̆ng rim Anih tơm, anih jang athei mă ‘lơ̆ng. Tơ̆ tơ ring jang kŭm tôch kơ ‘lơ̆ng, mă loi ‘noh jĭ sơ năm ‘nâu ‘noh sơ năm pơ tơm blŭng đei Luơ̆t hơ druh tơ dăm đei tơ mơ̆t yua. Khei hơ druh tơ dăm đei tơ drong pơ ma dơ nuh đơ̆ng bơ ngai chĕp kơ̆l tơ ring hăm hơ druh tơ dăm. Đe bơ ngai vang jang tơ gŭm tơ drong ‘nâu tôch kơ ‘lơ̆ng păng đơ̆ng tơ drong pơ ma dơ nuh ‘nohmă lĕch trong jang tơ gŭm, lĕch dôm nơ̆r tơ ƀôh găh tơ drong jang vă Anih jang pơ jao hơ năp jang chă iŏk tơ drong jang ăn hơ druh tơ dăm. Ĭnh kŭm ‘meh ‘nâu jĭ tơ drong hlôh vao păng bơ̆n gô hơ tŏk ‘lơ̆ng hloh tơ̆ hơ năp kơnh, mă loi ‘noh jĭ lơ̆m tơ drong hơ met ăn hop akŏm vă jê̆ truh.

VOV 1

Thuem: Tơ blơ̆