VOV4.Bahnar - Hơ tăih kơ anih kơ drơ̆m dêh char Kon Tum hloh 100 km, Đăk Glei jĭ apŭng sơ lam dơ nuh hin hloh dêh char, hăm vă jê̆ 90% kơ sô̆ kon pơ lei ‘noh jĭ bơ ngai kon kông, 11/12 xăh, thị trấn mơ mat ta dêh hloh. Gơ nang đơ̆ng jang kiơ̆ ‘lơ̆ng tơ drong jang pơ jing đảng tơ̆ tơ ring kon pơ lei kon kông, Đăk Glei hlôi hơ tŏk tơ drong joăt joe kach mang, pơ jing tơ ring sơ lam sơ đơ̆ng chĭnh trĭ, sơ đơ̆ng tơ pôl. Rim đảng viên ling lang jĭng dôm bơ ngai tơm, pơm jŭk yŭk trong hơ lâu lơ̆m rim tơ drong jang pơ jei băl ‘mêm kơ teh đak.

         Hăm kon pơ lei plei Đăk Ga, xăh sơ lam Đăk Nhoong, apŭng Đăk Glei, dêh char Kon Tum, mưh rim Chi bộ tơ mơ̆t đảng viên ‘nao ‘noh jĭ tơ drong jang kăl atŭm kơ pơ đĭ pơ lei. Dang ei, Chi bộ plei Đăk Ga đei 25 đảng viên păng đĭ đăng tă kơ bơ ngai Giẻ- Triêng. ‘Nhŏng A Cu, jang lơ̆m khŭl chĕp kơ̆l đảng pơ lei, bơ ngai pơ gơ̆r pơ lei tơ băt:

        “Mơ̆t Đảng tôch kơ chhôk hơ iă. Ƀơ̆t mơ̆t Đảng kơ dih kâu ĭnh tơ plih tôch kơ lơ. Ĭnh gơh băt đei lơ tơ drong hơ iă, đei tơ drong ‘lơ̆ng đơ̆ng ‘noh ĭnh tơ roi ăn kon pơ lei tơ̆ lơ̆m pơ lei. Đảng viên ‘noh jang hơ drol, pơ tho kon pơ lei hơ tŏk tơ iung mŭk drăm. Mă loi ‘noh jĭ hrei ‘nâu ‘noh tơ plih trong tơ chĕng, trong jang ba athei pơ cheh đei tơ drong ‘nao, tơ drong hơ iă. Tơ drong joăt so ưh kơ ‘lơ̆ng hŭt lê̆, tơ drong joăt ‘lơ̆ng hơ iă ‘noh ba vei dơ̆ng. Ĭnh ‘noh jĭ 1 ‘nu bơ ngai pơ gơ̆r pơ lei ‘noh ĭnh krao hơ vơn kon pơ lei jang sa hơ tŏk tơ iung mŭk drăm pơ jing ŭnh hnam phĭ tơ nŏ hiôk chơt.”

        Xăh sơ lam Đăk Nhoong đei Anih jang Đảng apŭng Đăk Glei hơ len lăng ‘noh jĭ 1 lơ̆m dôm tơ ring jang ‘lơ̆ng tơ drong jang hơ tŏk tơ iung Đảng tơ ring kon pơ lei kon kông. Dang ei Đảng bộ xăh đei 184 đảng viên, lơ̆m noh đei 156 đảng viên bơ ngai kon kông. 6 khei blŭng sơ năm ‘nâu, xăh hlôi đei dơ̆ng 8 đảng viên ‘nao. Ƀok A Nang, Phŏ Bí thư Đảng uỷ xăh Đăk Nhoong pơ ma hơ dăh, lơ̆m sơ năm ‘nâu pă jor Đảng bộ xăh jang đang tơ drong hơ găt hơ tŏk tơ iung 15 đảng viên ‘nao. 1 lơ̆m dôm tơ drong hlôh vao đơ̆ng Đảng bộ ‘noh jĭ set kĭ ăn hla ar hô sơ athei vei sơ đơ̆ng tơ tom păng ƀlep:

        “Ƀơ̆t Chi bộ set pơ truh ăn nhôn set roi hrôih roi ‘lơ̆ng. Nhôn hop akŏm Khŭl chĕp kơ̆l rim khei 1 ‘nu, 2 ‘nu nhôn kŭm pơ truh roi ăn. Dôm bơ ngai đơ̆ng rŏng ƀôh pơm hrĕnh, set hrĕnh ƀlep đơ̆ng rŏng âu đe hơ drin mơ̆t Đảng lơ hloh. Tơ dăh bơ̆n lê̆ oei đei hla ar hô sơ ƀơ̆t dâu 1 giĕng, 2 giĕng, ƀơ̆t doh 1 giĕng, 2 giĕng,gô hiong pơ đĭ sơ năm tam mă kĕ đang.”

        Đăk Glei jĭ 1 lơ̆m 3 apŭng mŭk drăm tơ pôl mơ mat tat hloh kơ dêh char Kon Tum, lơ̆m apŭng đei vă jê̆ 90% kơ sô̆ kon pơ lei ‘noh bơ ngai kon kông. Gơ nang đơ̆ng jang kiơ̆ ‘lơ̆ng tơ drong jang pơ jing đảng tơ̆ tơ ring kon kông, truh dang ei apŭng đei hloh 2.700 đảng viên, lơ̆m noh, hloh 1.800 đảng viên ‘noh jĭ bơ ngai kon kông, đei kơ sô̆ hloh 66%.

‘Nhŏng A Cu (păih ‘ngieo) bơ ngai jang lơ̆m đảng pơ lei, pơm hloi bơ ngai pơ gơ̆r pơ lei plei Đăk Ga, xăh Đăk Nhoong, apŭng Đăk Glei tơ ƀơ̆p, krao hơ vơn kon pơ lei sut hŭt tơ drong so ưh kơ ‘lơ̆ng

        Ƀok A Phương, Phŏ Bí thư Anih jang Đảng apŭng Đăk Glei tơ băt, Anih jang Đảng apŭng tôch kơ bơ ngơ̆t truh, vei lăng, hơ met ming khŭl jang Đảng tơ ring păng hơ tŏk tơ iung đảng viên tơ̆ dôm pơ lei pơ la. Đơ̆ng dôm tơ drong jang tơ̆ tơ ring tơ tom chă ƀôh, pơ hrăm ming bơ ngai ‘lơ̆ng vă tơ mơ̆t lơ̆m khŭl kơ Đảng păng kŭm hăm ‘noh jĭ vei đon lui, tơ drong ‘mêm đơ̆ng kon pơ lei kon kông hăm Đảng:

       “Nhôn klăih song dôm bơ ngai ‘noh jĭ khŭl chĕp kơ̆l pơ gơ̆r Anih jang Đảng apŭng, đang kơ ‘noh kơ dră đảng vei lăng tơ ring năm jur vă băt tơ drong đang kơ ‘noh pơ tho, răp hơ len dôm bơ ngai hơ gei bơ ngai kon kông.  Đảng viên ‘noh jĭ dôm bơ ngai chĕp kơ̆l, jĭ dôm bơ ngai pơm jŭk yŭk trong hơ lâu ăn tơ pôl. Tơ drong mă hơ drin mơ̆t  Đảng, mă loi ‘noh jĭ tơ ring kăn kư̆ kach mang đe sư ‘meh mơ̆t  Đảng vă pơ yua ăn kon pơ lei, pơ yua ăn pơ lei la teh đak yua kơ mĕ ƀă đe sư sơ̆ kŭm jing bơ ngai jang kach mang.”

Dôm đảng viên plei Đăk Ung, xăh Đăk Nhoong ling lang năm hơ drol lơ̆m dôm tơ drong jang kơ pơ lei

       Hăm lơ trong jang, nhen chă ƀôh bơ ngai ‘lơ̆ng vă pơ hrăm ming; hơ met pơ ‘lơ̆ng tơ tom hla ar hô sơ bơ ngai apĭnh mơ̆t Đảng; pơ gơ̆r pơ̆ih lăm pơ hrăm ming tơ drong hlôh vao găh Đảng kiơ̆ tơ ring, xăh..., lơ̆m jăl jang 2015-2020, Đảng bộ apŭng Đăk Glei tơ mơ̆t đei 700 đảng viên ‘nao, yak hloh 200 đảng viên pơ têng hăm tơ drong tơm tơ lĕch ăn. Jăl jang 2020-2025, Đảng bộ apŭng tơ lĕch tơ drong hơ găt tơ mơ̆t 600 đảng viên ‘nao. Kơ tă lơ̆m sơ năm mă blŭng jang kiơ̆ tơ drong tơ chơ̆t, Đăk Glei hlôi tơ mơ̆t đei 143 đảng viên ‘nao. Lui ngeh lơ̆m jăl jang âu, Đảng bộ apŭng Đăk Glei gô hơ nơ̆ng iŏk đei păng yak hloh tơ drong hơ găt hơ tŏk tơ iung Đảng, lơ̆m noh đei tơ drong hơ găt hơ tŏk tơ iung đảng viên bơ ngai kon kông. Tơ pă ăn ƀôh dôm đảng viên bơ ngai kon kông tơ̆ apŭng Đăk Glei, dêh char Kon Tum jĭ bơ ngai pơm jŭk yŭk trong hơ lâu lơ̆m tơ drong hơ tŏk tơ iung mŭk drăm tơ pôl, pơ jing tơ ring sơ lam roi ‘năr roi sơ đơ̆ng jang tŏk.

       Khoa Điềm: Chih

Thuem: Tơ blơ̆