Pơm lêh hop akŏm Kơdră tang măt đoàn hơdruh tơdăm CS Hồ Chí Minh Khŭl Ƀô̆ đô̆i ‘nao đei pơgơ̆r tơ̆ Hà Nội. Tơroi tơbăt tơ̆ pơm lêh hop akŏm: 5 sơnăm au ki bơ̆ jang đoàn, tơdrong jang Hơdrŭh tơdăm Ƀô̆ đô̆i hơnơ̆ng sơkơ̆t hơdăh hơnăp jang, hơnĭh dơ̆ng hơlau lơ̆m bơ̆ jang đoàn păng tơdrong jang hơdrŭh tơdăm, hơ iŏh lơ̆m tĕh đak, tơgop kơtang lơ̆m tơdrong jang tơ iung pơjing Khŭl Ƀô̆ đô̆i, tơ iung pơjing păng vei lăng tĕh đak. Tơdrong mă ‘nŏh đei ƀôh, khŭl hơdruh tơdăm ƀô̆ đô̆i hlôi jang ‘lơ̆ng hơnăp jang tĭh tên, tơdrong ‘mĕh vă kơtang.

Pơm lêh Hop akŏm Đoàn Hơdrŭh tơdăm Cộng sản Hồ Chí Minh Khŭl Ƀô̆ đô̆i.

Tơ̆ rim hơnĭh hơmet ‘lơ̆ng iung tơblăh, đoàn hơdrŭh tơdăm tơmơ̆t 80% măt bơngai ƀô̆ đô̆i, iung jang rim tơdrong jang vei lăng tĕh đak kơtang. 5 sơnăm au ki, 100% kang ƀô̆, đoàn viên hơdrŭh tơdăm jang keh đang hŏk pơhrăm tơdrong tơblăh, hŏk pơhrăm, chŏh jang sa ... ‘Nau jei jing khŭl hơnơ̆ng ƀô̆h kang bang kơ̆l tơ̆ rim tơring tơnap tap, hli hlơt tơgŭm djru kon pơlei tơ jră tang găn hơlau hăm tŏ ‘mi kial pơrăm, pơrang jĭ, tơchă dŏng tơgŭm, sơkơ̆t hơdăh hơnăp jang tơgŭm djru Tĕh đak, tơgŭm djru kon pơlei. Vang tơgop tŏ sĕt lơ̆m iŏk đei jơnei au, Thượng úy Phan Văn Linh, bơngai tang măt quân đoàn 1 tơbăt:“Pơjing jơhngơ̆m đon chĭnh trĭ kơ jăp, jơhngơ̆m đon ‘mêm kơ eng tĕh đak, jơhngơ̆m đon lui kiơ̆ kơ jăp lơ̆m trong iung tơblăh kơ Việt Nam, lơ̆m tơdrong kĕ jang, tơdrong kih thuơ̆t, trong pơ prŏ ƀrơ̆m phao kơtoang hrei au đei. Kiơ̆ yok jơhngơ̆m đon hơbĕch hơbal, tơchăr hơgei, đei jơhngơ̆m đon hơdrin, yak mơ̆t koăng lơ̆m tơdrong đei yan au, kĕ iung tơblăh hơbĕch hơbal, pơm kiơ̆ kơ jăp tơdrong pơkăp, tơchơ̆t, trŏ lăp hăm tơdrong bơ̆ jang lơ̆m rim tơdrong.”

‘Ngoăih kơ ‘nŏh, tơdrong jang tơchăr hơdrŭh tơdăm păng trong pơgơ̆r pôk hơpăh hơdrŭh tơdăm tơchăr đei ƀô̆h kơ hrĕng rơbau trong tơchăr ‘lơ̆ng, pơjing hơyak ‘lơ̆ng ăn rim hơdrŭh tơdăm bơ̆ jang khoa hŏk hơgei lơ̆m khŭl tĕh đak. Rơbau trong tơchăr hơgei lăp đơ̆ng rŏng iŏk đei tơmam hơpăh hơnơ̆ng đei bơngai tơchăr, khŭl tơchăr pơm pơkeh, tơmơ̆t jang kiơ̆ kơtang đei iok yua kơ jăp ăn tĕh đak mĭnh sơnăm đei trŭh kơ hrĕng ti hlak jên. Iŏk đei tơmam hơpăh hơdruh tơdăm tơchăr, Trung tá Hoàng Văn Tiến, Pơtho bơ̆ jang vơ̆r gre păr vũ trụ kơ Học viện Kỹ thuật Quân sự tơbăt:“Nhôn tôch kơ chhôk mư̆h hơnhăk jơhngơ̆m đon hưch hanh, jơhngơ̆m đon gơ̆h hơgei kơ bơ̆n vă pơjing đei tơmam drăm gơ̆h hơgei hlŏh dơ̆ng, tơgŭm ăn tơdrong jang gơ̆h hơgei kơ khŭl ƀô̆ đô̆i.”

Đại tướng Phan Văn Giang iung pơma tơ̆ Pơm lêh hop akŏm

Tơ̆ hơnăp dôm tơdrong jang ‘nao tơlĕch ăn tôch trăp trĭn mă lei tôch chơt hiôk hăm hơdrŭh tơdăm ƀô̆ đô̆i lơ̆m khei năr kơnh, Pơm lêh Hop akŏm Đoàn Hơdrŭh tơdăm Ƀô̆ đô̆i ‘măng mă au hlôi sơkơ̆t hơdăh trong jang kơtang hlŏh dơ̆ng hăm 10 trong tơlĕch jang tơm iung jang kiơ̆ lơ̆m jăl jang 2022-2027. Adoi pơma hơdăh 3 trong jang kăl hlŏh. ‘Nŏh: atŏk kơtang bơ̆ jang pơtho pơhrăm jơhngơ̆m đon ‘lơ̆ng kĕch mang; atŏk kơtang găh bơ̆ jang pơtho pơhrăm tơblăh, kơchăng iung tơblăh, pơtho pơhrăm, chă tơchĕng hơlen khoa hŏk, hŏk pơhrăm nơ̆r Tĕh đak đe, nơ̆r Kon kông, jang gơ̆h lơ̆m iŏk yua kmăi kmŏk ming hơmet păng pơm tơlĕch mĭnh ƀar ƀrơ̆m phao kơtoang 'nao, gơ̆h hơgei, bơ̆ jang gơ̆h hơgei kmăi kơmŏk pơre nơ̆r, tơchăr hơgei lơ̆m pơjing jang kiơ̆ kmăi kmŏk kơsô̆; atŏk kơtang găh bơ̆ jang pơjing oei sa ‘lơ̆ng, atŏk kơtang jơhngơ̆m đon jang kiơ̆ khôi luơ̆t, kih luơ̆t păng sơđơ̆ng dơ̆ng kơ jăp. Bơ̆ jang đoàn păng tơdrong jang hơdrŭh tơdăm hlôi, tŏk bŏk păng oei jing tơdrong kăl lơ̆m tơdrong tơchơ̆t khŭl kơdră chĕp pơgơ̆r, trong pơprŏ bơ̆ jang đảng, bơ̆ jang chĭnh trĭ kơ rim hơnĭh jang, nhen nơ̆r pơma dơnŭh đơ̆ng Trung tướng Trần Hoài Trung, Kơdră chĕp pơgơ̆r Đảng ƀô̆ đô̆i Quân khu 7:“Khŭl kơdră chĕp pơgơ̆r đảng, chĭnh trĭ, bơngai jang chĭnh trĭ, bơngai chĕp pơgơ̆r, hơnĭh bơ̆ jang chĭnh trĭ hlôi iung jang chĕp pơgơ̆r, pơrô̆ jang, pơjing rơvơn hlŏh ăn bơ̆ jang đoàn păng tơdrong jang hơdrŭh tơdăm atŏk tơ iung, tơgop lơ̆m vă khŭl ƀô̆ đô̆i lơ̆m Quân khu bơ̆ jang keh đang rim tơdrong jang đei pơjao. Ƀô̆h hơdăh hơnăp jang, sơnong jang, tơdrong kăl kơ bơ̆ jang đoàn, tơdrong jang hơdrŭh tơdăm păng jei hrơ̆p mĭnh đon, mă đơ̆ng tơdrong jang yă kiơ, ‘mĕh vă jang keh đang tĕnh koăng păng ‘lơ̆ng liĕm, kăl đei bơngai chĕp pơgơ̆r păng kăl đei trong jang, lơ̆m au tơdrong jang hơdrŭh tơdăm ‘nŏh jing tơdrong jang gĭt kăl hlŏh”.

Dôm trong tơlĕch jang kơ hơdrŭh tơdăm ƀô̆ đô̆i gô tơgop lơ̆m tơ iung pơjing Khŭl ƀô̆ đô̆i hơbĕch hơbal, kơtoei, pran kơtang, pơjing hơyak pran kơ jăp iăp kơtang vă sơnăm 2030 Khŭl ƀô̆ đô̆i yak trŭh gơ̆h hơgei kĕ vei lăng tĕh đak đơ̆ng hrôih, đơ̆ng hơtăih, tŏk bŏk đei tơgŭm păng iung jang. Kơ iĕng Bí thư Quân ủy Trung ương, Yŏng Khŭl Ƀô̆ đô̆i Vei lăng sơlam tĕh đak Đại tướng Phan Văn Giang pơma hơdăh tơ̆ Pơm lêh hop akŏm:“Quân ủy Trung ương, Kơdră chĕp pơgơ̆r Khŭl Ƀô̆ đô̆i lui kiơ̆ kơ jăp lơ̆m khŭl hơdrŭh tơdăm khŭl ƀô̆ đô̆i, adoi hơnơ̆ng lăng ba kơ jăp păng pơjing rơvơn hlŏh vă rim ‘nu vang iung jang dôm tơdrong hơpơi ‘mĕh vă tơgop lơ̆m tơdrong jang tơ iung pơjing Khŭl Ƀô̆ đô̆i Kon pơlei Việt Nam gơ̆h hơgei, hơbĕch hơbal, roi năr roi gơ̆h hơgei hlŏh, tơ iung pơjing păng vei lăng Tĕh đak Việt Nam xã hội chủ nghĩa. Athei đĭ đăng bơ̆n hơnơ̆ng hơdrin hlŏh dơ̆ng vă tơgăl hăm jơhngơ̆m đon lui kiơ̆ păng hơpơi ‘mĕh vă đơ̆ng Quân uỷ Trung ương, Dơnŏ anĭh tơm Ƀô̆ đô̆i vei lăng sơlam tĕh đak.”