VOV4.Bahnar - Jang kiơ̆ Tơdrong vă jang “ Pơtăm mĭnh ti dơnơm ‘long yơ̆p jăl jang 2021-2025” đơ̆ng Thủ tướng tĕh đak, pơgê năr 4/7, tơ̆ jăl trong ver Trong hông hang krang nak Măng Đen tơ̆ trong glung 24, jăl trong găh thĭ trân Măng Đen, apŭng Kon Plông, Khŭl Kơdră chĕp pơgơ̆r Dơnŏ anih Đoàn dêh char Kon Tum pơgơ̆r iung jang pơtăm ‘long ƀar păh jĭh trong glung pơjing măt lăng ‘lơ̆ng adoi vei lăng cham char.

Bí thư Đảng dêh char, Kơdră chĕp pơgơ̆r Jơnŭm vei lăng kon pơlei dêh char Kon Tum vang năm pơtăm ‘long atŭm hăm khŭl đoàn hơdrŭh tơdăm

Kơtă tơ̆ tĭl pơgê, hlŏh 300 ‘nu kang ƀô̆, bơngai jang đoàn, hơdrŭh tơdăm atŭm hăm kon pơlei oei ƀar apŭng Kon Brăih hăm Kon Plông, dêh char Kon Tum hlôi pơtăm rơbau dơnơm ‘long hơngo ‘moi kiơ̆ 2 jĭh trong glung ver trong hông hang krang nak Măng Đen. Hăm trong tơlĕch jang, mĭnh hơnĭh đoàn pơjing đei tơdrong jang pơtăm ‘long, đơ̆ng sơnăm 2020 trŭh dang ei, hơdrô̆ tơ̆ jal trong hông hang krang nak Măng Đen, Khŭl kơdră chĕp pơgơ̆r Dơnŏ anih Đoàn dêh char Kon Tum hlôi jang hơdoi hăm rim hơnĭh bơ̆ jang ƀơm trŭh pơgơ̆r 3 ‘măng năm iung jang, pơtăm đei 20.000 dơnơm ‘long hơngo pơjing đei măt lăng ‘lơ̆ng păng vei lăng cham char.

Tơblơ nơ̆r: Amazưt