VOV4.Bahnar - Gơmăng năr 24/7, Khul Kơdră chĕp pơgơ̆r Đoàn dêh char Kon Tum pơgơ̆r Pơm lêh “Sŏh jrĕnh tơbăt jơhngơ̆m ‘mêm kơ eng Ƀô̆ đô̆i lôch dŏng tĕh đak”. ‘Nau jing mĭnh lơ̆m lơ tơdrong jang kơ đe hơdrŭh tơdăm dêh char Kon Tum ƀlep lơ̆m năr tơbăt 75 sơnăm Năr Bơngai rơka lôch dŏng tĕh đak 27/7.  

Bơngai jang Đoàn pơlei tơm Kon Tum sŏh jrĕnh tơbăt jơhngơ̆m đon ‘mêm kơ eng ăn Ƀô̆ đô̆i lôch dŏng tĕh đak

Pơm lêh “Sŏh jrĕnh tơbăt jơhngơ̆m ‘mêm kơ eng Ƀô̆ đô̆i lôch dŏng tĕh đak” đei Khŭl kơdră chĕp pơgơ̆r Đoàn dêh char Kon Tum pơgơ̆r tơ̆ ƀar hơnĭh tơm ‘nŏh Pơsat Tĕh đak kơ dêh char păng Hơnih man tơbăt ƀô̆ đô̆i lôch dŏng tĕh đak Sư đoàn 10 tơ̆ pơlei tơm Kon Tum. Atŭm hăm ‘nau tơ̆ 47 hơnĭh jang ƀlŏk hơdơ̆r ƀô̆ đô̆i lôch dŏng tĕh đak tơ̆ 10 apŭng, pơlei tơm kơ dêh char, rơbau ‘nu đoàn viên, hơdrŭh tơdăm kơ 102 tơring, phương, thĭ trân jei vang pơgơ̆r Pơm lêh Sŏh hlôt nhang, glơng gơvang pơkao păng vang sŏh hloh 7.000 ŭnh jrĕnh vă tơbăt jơhngơ̆m đon hôn bơnê rim ƀô đô̆i nuih mơng plang akau kơ yuơ tơdrong rơngei hiôk hian ăn tĕh đak.

Khŭl tơdăm Ƀô̆ đô̆i sŏh jrĕnh tơbăt jơhngơ̆m đon ‘mêm kơ eng ăn Ƀô̆ đô̆i lôch dŏng tĕh đak

Dang ei dêh char Kon Tum đei 7.479 lŏk ƀô̆ đô̆i đei ƀŭ tơ̆ 10 Pơsat tĕh đak lơ̆m dêh char. 5 sơnăm au ki rim hơnĭh bơ̆ jang kơ dêh char hlôi năm tơchă kôch akŏm đei 233 ‘nu ƀô̆ đô̆i lôch dŏng tĕh đak. Lơ̆m dêh char hrei au đei 49 hơnĭh jang ƀlŏk hơdơ̆r ăn ƀô̆ đô̆i lôch dŏng tĕh đak, lơ̆m au đei 10 pơsat Tĕh đak, 36 hơnih man tơbăt chĭh hơnăn ƀô̆ đô̆i lôch dŏng tĕh đak păng 3 Hơnĭh man tơbăt Ƀô̆ đô̆i lôch dŏng tĕh đak.

Tơblơ̆ nơ̆r: Amazưt