VOV4.Bahnar - Âu ki, Đoàn hơdrŭh tơdăm Cộng sản Hồ Chí Minh mĭnh ƀar dêh char tơring Tây Nguyên hlôi pơgơ̆r Pơm lêh hop akŏm jăl jang 2022  -2027. Đơ̆ng nŏh đei ƀôh, jăl jang au ki, bơ̆ jang Đoàn păng tơdrong jang hơdruh tơdăm, hơ iŏh lơ̆m tơring hlôi iŏk đei jơnei ‘lơ̆ng hơ iă, hăm lơ tơdrong jang tôch ‘lơ̆ng hơ iă tơ̆ rim tơring.

Pơm lêh Hop akŏm Đoàn hơdrŭh tơdăm Cộng sản HCM dêh char Gia Lai ‘măng mă XV

Kiơ̆ tơbăt tơ̆ Pơm lêh hop akŏm Đoàn hơdrŭh tơdăm Cộng sản Hồ Chí Minh dêh char Gia Lai ‘măng mă XV, jăl jang au ki, hơdrŭh tơdăm tơring tơlĕch lơ tơdrong jang ‘lơ̆ng hơ iă. ‘Nŏh rim tơdrong jang: “Hơdrŭh tơdăm năm iung jang pơyan pơdơ̆h hŏk”, “Pơm tơplĭh jơhngơ̆m đon tơchĕng, trong jang sa lơ̆m tơring kon kông vă roi năr roi yak hlŏh dơnŭh kơ jăp”, “Hơdrŭh tơdăm Gia Lai vang hơdrin yak hlŏh jĭ hơbŭh”. Hlŏh đơ̆ng au, atŏk kơtang jơhngơ̆m đon pơm jŭk yŭk trong hơlau năm iung jang kơ đoàn viên, hơdrŭh tơdăm.

Jơ ‘năr au, Khul kơdră chĕp pơgơ̆r Đoàn dêh char Gia Lai hlôi pơgơ̆r pôk pơ ư tơpôl, rim bơngai jang ‘lơ̆ng lơ̆m bơ̆ jang đoàn păng tơdrong jang hơdruh tơdăm hơ iŏh jăl jang 2017 - 2022. Mă hơdăh, hlôi đei 27 ‘nu bơngai păng 28 khul tơpôl pôk pơ ư; Kơdră chĕp pơgơ̆r Dơnŏ anĭh vei lăng kon pơlei dêh char Gia Lai pôk ăn Hla bơar hôn bơnê ăn 5 khŭl păng 10 ‘nu bơ̆ jang gơ̆h hơgei, jang ‘lơ̆ng lơ̆m tơdrong jang Đoàn păng tơdrong jang hơdruh tơdăm hơ iŏh. ‘Nhŏng Lê Thế Đô, Bí thư Đoàn apŭng Chư̆ Prông đei Dơnŏ anĭh vei lăng kon pơlei dêh char pôk ăn Hla bơar hôn bơnê pơma: “ Lơ̆m jăl jang 2017 – 2022 hlôi đei lơ tơdrong tơnap tap, mă kăl ‘nŏh jĭ hơbŭh, mă lei hăm hơdrin đĭ ai kơ jơhngơ̆m đon hơdrŭh tơdăm Gia Lai kơ na tơdrong jang đoàn păng tơdrong jang hơdrŭh tơdăm hơ iŏh đei tơlĕch jang jơ. Năr au kơ dĭh bă tôch chơt hơ iă jĭ bơngai kang ƀô̆ đoàn đei pôk pơ ư, păng lăng ‘nau jing jơhngơ̆m pran vă kơ ba hơdrin hlŏh dơ̆ng, vang tơgop hlŏh dơ̆ng ăn tơdrong jang đoàn păng tơdrong jang hơdrŭh tơdăm hơ iŏh kơ dêh char roi năr roi pran kơtang hlŏh dơ̆ng”.

Dak Lăk pôk pơ ư 25 tơdrong jang păng 34 ‘nu kang ƀô̆ đoàn jang ‘lơ̆ng gơ̆h hơgei

Hăm trong tơlĕch jang " Tơgoăt tơgoăl-Pơm jŭk-Hơbĕch hơbal-Tơchăr hơgei-Hơpơi ‘mĕh vă”, Pơm lêh hop akŏm Đoàn Hơdrŭh tơdăm Cộng sản Hồ Chí Minh dêh char Gia Lai ‘măng mă XV tơlĕch 13 trong jang tơm lơ̆m jăl jang 2022 -2027. Mĭnh lơ̆m dôm tơdrong đei jang jơnei rim trong jang, trong tơgŭm djru đe hơdrŭh; hơnơ̆ng jang ‘lơ̆ng rim tơdrong jang ‘mêm mơnat, năm iung jang tơ̆ tơring vă vang tơgop lơ̆m bơ̆ jang xut xa pơngot rơvĕt tơjur dơnŭh păng tơ iung pơjing tơring tơrang ‘nao. ‘Nhŏng Lê Trọng Phúc, Bí thư Đoàn apŭng Đức Cơ pơma:“ Tơdrong hơmŏ hăm dôm tơdrong jang atŏk kơtang tơdrong jang hơdruh tơdăm păng dôm tơdrong jang yak hơdoi hăm hơdrŭh tơdăm, mă kăl ‘nŏh tơdrong pơjing tơdrong jang vă pơjing rơvơn ăn hơdrŭh tơdăm đei hơvơn atŏk tơ iung. ‘Mĕh vă dôm bơngai tang măt bơ̆ jang ‘lơ̆ng kĕ jang, pơnam hlŏh dơ̆ng, hơnhăk bơ̆ jang đoàn păng tơdrong jang hơdrŭh tơdăm kơ dêh char roi năr roi atŏk tơ iung hlŏh dơ̆ng”.

Jei lei lăi, lơ̆m giĕng au ki, Đoàn Hơdrŭh tơdăm CS Hồ Chí Minh dêh char Dak Lăk jei hlôi pơgơ̆r Pơm lêh Hop akŏm Kơdră tang măt mă 12, jăl jang 2022-2027. Ƀô̆h hơdăh lơ̆m 5 sơnăm au ki kơ hơdrŭh tơnăm Dak Lăk ‘nŏh iung jang keh đang hlŏh 6.000 hơnĭh jang, tơdrong jang hơdrŭh tơdăm hăm kon jên jang vă jê̆ 97 ti 500 trĭu hlak jên. Khŭl Kang ƀô̆ Đoàn rim hơnĭh bơ̆ jang tơnăp, pơm jŭk yŭk trong hơlau hăm tơdrong jang, kơrŭn đĭ jơhngơ̆m kơ yuơ đoàn viên hơdrŭh tơdăm, jĭ bơngai pơm jŭk yŭk trong hơlau chông ba tơdrong jang pơting dĭh băl ‘mêm kơ eng kơ tĕh đak lơ̆m khŭl hơdrŭh tơdăm. Jơ ‘năr au, Dơnŏ anĭh Đoàn dêh char Dak Lăk hlôi pôk pơ ư 25 tơdrong jang hơdrŭh tơdăm păng 34 ‘nu kang ƀô̆ Đoàn jang ‘lơ̆ng jăl jang 2017-2022. Mŏ Lương Thị Nga, Bí thư đoàn tơring Ia Rvê, apung Ea Súp, đei pôk pơ ư ‘măng mă au pơma:“Ba tôch chơt hơ iă tơpă mơ̆n. Mă ƀar ‘nŏh tôch hơmanh bơnê păng pŭn ai kơ dĭh ba iŏk đei tơmam hơpăh păng ‘mĕh vă lơ̆m jăl jang kơnh păng khei năr kơnh ‘nŏh ba gô hơdrin hlŏh dơ̆ng vă tơgăl hăm hơnăn mă ba ‘nao iŏk đei, vă chă akŏm đoàn viên, hơdrŭh tơdăm mơ̆t lơ̆m khŭl Đoàn. ‘Nau jing tơdrong hơdrin ư̆h khan lăp hơdrô̆ đoàn mă lei pơ đĭ rim khŭl vang iung jang hơdoi vă vang tơgŭm djru, pơtho tơbăt, pơrô̆ hơvơn đoàn viên hơdrŭh tơdăm vang iung jang”.

Hơdrol kơ ‘nŏh, Đoàn Hơdrŭh tơdăm CS Hồ Chí Minh dêh char Dak Nông jing Hơnĭh blŭng a lơ̆m tơring Tây Nguyên pơgơ̆r Pơm lêh Hop akŏm jăl jang 2022-2027. Mĭnh lơ̆m dôm tơdrong jang ‘lơ̆ng hlŏh kơ hơdrŭh tơdăm Dak Nông ‘nŏh vang tơ iung pơjing tơring tơrang ‘nao. Rim hơnĭh Đoàn hlôi iung jang keh đang 7.000 tơdrong jang hơdrŭh tơdăm hăm akŏp kon jên iŏk đei hlŏh 38 ti hlak jên. Hơdrŭh tơdăm Dak Nông jei hlôi pơtăm hlŏh 700.000 dơnơm ‘long; pơjing 127 hơnĭh hop akŏm, pơchơt pơ hiơ̆ ăn hơdrŭh tơdăm hơ iŏh, pơgơ̆r lơ tơdrong jang tơgŭm djru đe hơ iŏh tơnap tap tap hăm kon jên hlŏh 15 ti hlak jên.

 Hăm trong tơlĕch jang " Hơdrŭh tơdăm Dak Nông pơm jŭk, Hơpơi ‘mĕh vă, Tơchăr hơgei, atŏk tơ iung”, Pơm lêh Hop akŏm Đoàn hơdrŭh tơdăm CS Hồ Chí Minh dêh char Dak Nông ‘măng mă IV, jăl jang 2022- 2027 hlôi tơlĕch 12 tơdrong jang, 8 tơdrong vă jang, tơdrong jang kăl hăm kơrŭn đĭ jơhngơ̆m pơjing tơdrong hơpơi ‘mĕh vă jing đei tơpă. Mă kăl ‘nŏh dôm trong tơlĕch jang nhen: Rim sơnăm pơtăm ‘nao 250.000 dơnơm ‘long; tơgŭm djru 10 pơlei tơnap tap jang keh đang trong pơkăp jing tơring tơrang ‘nao; tơgŭm djru 20 ti hlak jên ăn hơdrŭh tơdăm tŏk iŏk vă pơjing tơdrong jang; jô̆ hơtŏ lơ̆m sơnăm tơjur hlŏh 6% ŭnh hnam hơdrŭh tơdăm kon kông yak hlŏh dơnŭh hin.

VOV Tây Nguyên/Amazưt tơblơ̆