VOV4.Bahnar - Đơ̆ng rŏng 1 giĕng năm hŏk kơ tă tơ̆ hnam trưng, hơ iŏh mâm non, hŏk tro jăl 1 păng hŏk tro lăm 6 tơ̆ plt Buôn Ma Thuột, dêh char Dak Lak athei hŏk dơ̆ng trư̆k tuyê̆n đơ̆ng ‘năr 21/2/2022 klĕp truh đei nơ̆r pơ tho plơ̆ng dơ̆ng. 

Hŏk tro mâm non, jăl 1 tơ̆ plt Buôn Ma Thuột hŏk trư̆k tuyê̆n dơ̆ng đơ̆ng rŏng 1 giĕng năm hŏk kơ tă tơ̆ Hnam trưng

Tơ drong mă Dơ nŏ anih vei lăng kon pơ lei plt Buôn Ma Thuột, dêh char Dak Lak tơ chơ̆t athei pơ dơ̆h năm hŏk kơ tă tơ̆ hnam trưng hăm jăl mâm non, jăl 1 păng hŏk tro lăm 6 ‘nŏh yoa jĭ Covid 19 oei tơ pŏh tôch hơ mơt tơ̆ tơ ring. Truh dang ei đei hlŏh 40 thây kô păng hlŏh 420 ‘nu hŏk tro tơ pŏh pơ rang jĭ SARS- CoV2. Oei đe hơ iŏh hơ la kơ 11 sơ năm ‘nŏh tam đei ƀet vắc xin tang găn jĭ Covid 19.

Vă vei lăng ‘lơ̆ng jơ hngâm pran ăn hŏk tro păng thây kô, Dơ nŏ anih vei lăng kon pơ lei plt Buôn Ma Thuột, dêh char Dak Lak đei nơ̆r athei pơ dơ̆h năm hŏk kơ tă tơ̆ hnam trưng hăm hŏk tro jăl mâm non, jăl 1 păng lăm 6 tơ̆ plt đơ̆ng ‘năr 21/2/2022 klep truh đei nơ̆r pơ tho plơ̆ng dơ̆ng. Pơ jao ăn Anih vei lăng pơ tho pơ hrăm plt pơ gơ̆r tơ lĕch trong hŏk trư̆k tuyê̆n hăm dôm jăl hŏk âu dơ̆ng. 

Dơ̆ng: Tơ blơ̆