‘Măng ‘mi tih đak lip ƀât hơtuch khei 11/2025 tơ̆ dêh char Khánh Hòa pơm hiong răm hlŏh 6.000 ti hlak jên, pơm ăn 22 ‘nu bơngai lôch, 20 ‘nu bơngai rơka păng kơhrĕng rơbâu unh hnam kon pơlei pŭ răm. Ƀok Nguyễn Hồng Trường, Kơdră Anih hơlen năng hơyuh planh teh Khánh Hòa, ăn tơbăt pơyuh plenh teh tơplih roi đunh roi ưh sơđơ̆ng. Tơ̆ đak krong Cái Nha Trang, mă đơ̆ng đak tih tam mă biơh tŏk tôch dêh đơ̆ng găh tu, mă lei tơ̆ găh Pơbăh đak tŏk đĭ tôch dêh bơih. Tơdrong tơm ‘nŏh yoa đơ̆ng ‘mi tih hơdai hăm tơdrong pơjing ming man tơring kơdrâm pơm ăn đak krong roi iĕ, đak ưh jăh hrơ̆. Đak krong kơđeh, krang, kơdơ tơmăn iĕ kŭm pơm ăn đak tih tŏk hrĕnh, hrŏ hrĕnh mă lei tơdrong krê hơmơt kŭm roi dêh ‘năi.

“Nhôn oei tơlĕch trong hơlen năng rim tơdrong đơ̆ng đak lip tơ̆ dôm tơring đak lơ̆p jrŭ. Kŭm nhen tơ̆ hnam nhôn oei tuơ̆ng ƀôh đak lơ̆p sơ̆, tơ̆ anih jang kŭm đei vă jê̆ 20 unh hnam kăn ƀô̆, bơngai jang đei đak lơ̆p hnam đơ̆ng 1 truh vă jê̆ 2 mét, năng 'nŏh băt đak lơ̆p truh dang yơ hloi. Kiơ̆ đơ̆ng noh, nhôh chih pơjing lakak anih đak lơ̆p, đơ̆ng chă roi tơƀôh ăn Anih vei lăng kon pơlei dêh char tơlĕch trong jang, pơm hơtŏk tơdrong đei yoa đơ̆ng tang găn sar bar tŏ 'mi kial kơnê̆ tơ̆ hơnăp kơnh”.

Đơ̆ng tơlĕch trong tơjră tơpă tơ̆ yăn âu lơ̆m ‘măng ‘mi tih đak lip ƀât hơtuch sơnăm sơ̆, Thiếu tướng Nguyễn Túy, Yŏng Anih chĕp kơ̆l pơgơ̆r khul linh dêh char Khánh Hòa, roi tơƀôh dôm tơdrong tam mă ‘lơ̆ng athei hơmet ming ‘nŏh jĭ: Tơdrong hơlen năng tơring tam mă kơjăp, tơdrong jang hơdoi đơ̆ng dôm khul linh oei tơhlăk tăk, trong jang “4 kơtă” tam tom iŏk yoa dei dei hloi, păng tơdrong roi tơbăt pơyoa ăn tơdrong chĕp kơ̆l pơgơ̆r oei tam gan ‘lơ̆ng hai. Thiếu tướng Nguyễn Túy athei chih pơjing hloi lakak tơring đak lơ̆p vă gơ̆h kơchăng hơlen năng tơring kon pơlei oei, pôk rĭ kon pơlei lĕch đơ̆ng tơring krê hơmơt; kơchăng hơmet tôm tơmam, kơmăy kơmŏk; hơtŏk tơdrong pơtâp pơhrăm păng hơtŏk đon jang rơgei mưh bơ̆jang hơdoi đơ̆ng dôm khul linh.

“Anih pơgơ̆r jang vei lăng kon pơlei kơ dêh char pơtho ăn dôm tơring, khul grŭp hơnơ̆ng dăr lăng tơring kon pơlei oei xa, anih jang, anih pơm kơđông oei; athei pôk rĭ, chông tơlĕch bơngai, tơmam, kơmăy kơmŏk lĕch đơ̆ng tơring krê hơmơt. Atŭm hăm 'nŏh roi tơƀôh ăn Anih vei lăng kon pơlei dêh char pơjing trong jang tŏk mŭk drăm, tơpôl đei yoa 'lơ̆ng, lăp hăm rim tơring, hơmet 'lơ̆ng ăn tơdrong jang tang găn sar bar đơ̆ng tŏ 'mi kial kơnê̆ păng chă dŏng bơngai răm”.

Ƀok Trần Phong, Kơdră vei lăng kon pơlei dêh char Khánh Hòa akhan, athei năng tơdrong jang tang găn sar bar kiơ̆ trong jang mă kơchăng hlŏh, bơ̆ jang đunh đai. Kŭm hăm tơdrong hơlen năng dôm tơring krê hơmơt, tơring athei hơmet lê̆ hơdrol mă ‘lơ̆ng trong tang găn, hơtŏk đon chĕp kơ̆l pơgơ̆r păng jang kiơ̆ khoa hŏk kơmăy kơmŏk mưh chă hơlen năng, tơdra, roi tơbăt hơdrol găh tŏ ‘mi kial kơnê̆.

“Athei jăh hơlen năng, hơmet ming, chih pơjing trong jang tang găn sar bar đơ̆ng 2026–2030; chih hơmet mă tôm trong tơjră kiơ̆ rim tơdrong krê thoi yơ, lăp hăm rim tơring. Atŭm hăm ‘nŏh, hơtŏk tơdrong pơgơ̆r bơ̆ jang; tơplih hăm kơmăy sô̆, iŏk yoa khoa hŏk, kơmăy kơmŏk mưh chă hơlen năng, tơdra, roi tơbăt hơdrol păng pơtho tơƀôh truh tơ̆ tơring”.

Mă tơpă tơ̆ Khánh Hòa ăn ƀôh, ƀât mă tŏ ‘mi kial tơplih ưh ê, tơdrong sar bar đa đei ưh pă trŏ pơyan thoi sơ̆. Mưh dôm kơsô̆ sơđơ̆ng hơnơ̆ng đei phă hŭt, ‘nŏh kơsô̆ đơ̆ng kơmăy hơlen năng, tơdrong rơgei hlôh vao mưh tơdra hơdrol păng đon kơchăng tơjră jĭ tơdrong tôch gĭt kăl. Dôm ƀai hŏk đơ̆ng ‘mi tih đak lip, tơdăh đei chih iŏk mă ‘lơ̆ng sư gô jing tơdrong tơm vă dôm tơring gơ̆h kơchăng ƀiơ̆ tơ̆ hơnăp dôm tơdrong sar bar, tơjur ƀiơ̆ hiong răm păng vei lăng sơđơ̆ng 'lơ̆ng ăn kon pơlei./.