‘Năr brei (30/6), tơ̆ Hơnih Hop akŏm tơm dêh char Gia Lai ‘nao, Kơdră Anih Tơroi tơbăt păng Krao hơvơn kon pơlei Trung ương Nguyễn Trọng Nghĩa hlôi pơgơ̆r păng roi tơbăt hơdăh dôm tơdrong tơchơ̆t, hơgăt gĭt kăl đơ̆ng Trung ương păng tơring ƀơm truh tơdrong tơmơ̆t hơdai anih bơ̆jang dêh char Gia Lai păng dêh char Bình Định. Pơma pơgơ̆r tơ̆ jơ pơm lêh, ƀok Nguyễn Trọng Nghĩa pơma hơdăh, tơdrong proh hơmet anih bơ̆jang tơ̆ dêh char ưh khan lăp jing tơdrong pơih să găh hơgăt teh să dăh mă kơsô̆ kon pơlei mă oei pơm đei dôm tơman ‘lơ̆ng hơtŏk tơiung ‘nao tôm tơdrong.

Dêh char Gia Lai ‘nao gô đei tơdrong hiôk hơtŏk tơiung pran kơtang lơ̆m dôm tơdrong jang nhen kơmăy kơmŏk, choh jang sa kơmăy kơmŏk ‘nao, ŭnh hơyuh rơgoh, pơvih pơvăn, tơnŏk đak dơsĭ, logistics păng tơmang lăng. Tơdrong tơmơ̆t hơdai Gia Lai păng Bình Định hăm hơnăn krao dêh char Gia Lai ưh khan lăp pơm đei 1 hơnih mŭk drăm păng chĭnh trĭ ‘nao mă oei pơih đei tơdrong hiôk vă dêh char Gia Lai hơtŏk tơiung tôm tơdrong. Hăm trĕng lăng tơdrong jang păng tơdrong chĕp kơ̆l tôch kơtang, dêh char Gia Lai đei hơmĕng gô jing 1 tơring ‘lơ̆ng, tơgop ‘lơ̆ng lơ̆m tơdrong hơtŏk tơiung atŭm kơ tơring păng lơ̆m teh đak.