Jĭ 1 lơ̆m 84 ‘nu bơngai đei pôk pơm Bơngai tang măt Jơnŭm pơgơ̆r kon pơlei dêh char Đắk Lắk jăl jang đơ̆ng 2026–2031, yă H’Giang Niê, Bí thư Đảng, Kơdră Jơnŭm pơgơ̆r kon pơlei xăh Ea M’Droh, hơnơ̆ng iŏk đei đon lui đơ̆ng bơngai tăh hla đơ̆ng rŏng 1 jăl jang lơ̆m Jơnŭm pơgơ̆r kon pơlei dêh char. Kiơ̆ yă H’Giang, tơdrong đei pôk hơtŏk dơ̆ng âu ưh lăp tơƀôh đon lui đĕch mă oei tơlĕch ăn kơ dih kâu athei đei trong jang mă hơdăh hlŏh dơ̆ng. Rim hla kơphĭu đơ̆ng kon pơlei gơih ba hloi đon lui găh 1 tơdrong tơplih ‘nao, jang tŏk pran hlŏh dơ̆ng tơ̆ tơring teh ‘nâu. 

Yă H’Giang tơroi: “Lơ̆m trong jang Khul kơdră pơgơ̆r tơring 2 tăl inh chih hơdăh hơnăp jang ‘nŏh jĭ “gơng tơƀưh” tơpăt păng jê̆ kon pơlei hlŏh. Inh vă vei kơjăp tơdrong pơvei, roi tơƀôh trŏ ƀlep păng tơtom rim nơ̆r pơma đơ̆ng bơngai tăh hla ăn dôm ‘măng hop akŏm Jơnŭm pơgơ̆r kon pơlei dêh char, pơm ‘lơ̆ng dôm tơdrong tơchơ̆t đei tơlĕch athei trŏ ƀlep, lăp hăm tơdrong ‘mĕh vă tơ̆ tơring. Lơ̆m noh inh tơrek hlŏh jĭ tơdrong tơgŭm ăn kon kông, tơguăt trong chă tơmang lăng hăm choh jang xa păng chĕp vei kơjăp dôm tơdrong juăt, jŏh ayŏ kơ dŏ xoang, tơgŭm ăn kon pơlei pơm sơđơ̆ng tơdrong arih xa păng jang tŏk klăih đơ̆ng tơnuh hin kơjăp ‘lơ̆ng”.

Oei hăm yă Ngô Thị Minh Trinh, Bí thư Đảng, Kơdră Jơnŭm pơgơ̆r kon pơlei xăh Ea Knuếc, dêh char Đắk Lắk ƀôh hơdăh lơ̆m jăl jang tŏk ‘nao, bơngai tang măt ăn kon pơlei ưh lăp răp mơ̆ng, chĕp răk, roi tơbăt trŏ đon tơchĕng đơ̆ng bơngai tăh hla, vei lăng tơdrong đei yoa trŏ luơ̆t đơ̆ng kon pơlei đĕch mă oei athei đei đon nuih, rơgei păng pơn bơ̆ jang, vang bơ̆ jang mă lơ ƀiơ̆ lơ̆m tơdrong chih pơjing păng dăr lăng tơdrong tơgŭm, mă loi hăm dôm tơdrong tơ̆ tơring đei lơ tơdrong ‘lơ̆ng mă lei tam mă đei iŏk yoa pơđĭ.

Yă Ngô Thị Minh Trinh ăn tơbăt: “’Nâu jĭ 1 tơdrong hơiă tih hăm kơdih kâu păng inh hơnơ̆ng tơchĕng, hưch hanh athei đei hloi đon tơnăp. Kơlih thoi noh mă kơdih kâu inh athei jang mă ‘lơ̆ng hlŏh hơnăp jang pơm bơngai tang măt ăn kon pơlei. Hăm dêh char Đắk Lắk tơdrong ‘lơ̆ng ‘nŏh jĭ jang tŏk choh jang xa, hăm hơnăp jang đơ̆ng bơngai tang măt, inh vă akŏm jơhngâm kŭm hăm khul kơdră pơgơ̆r tơring pơjing trong jang hơtŏk kơjă dôm tơmam đơ̆ng choh jang xa đei vă hơnhăk ba tơdrong sơđơ̆ng ‘lơ̆ng ăn kon pơlei kŭm nhen tơdrong jang tŏk atŭm kơ dêh char, mă loi jĭ akŏm jơhngâm bơ̆ jang vă gơ̆h jang tŏk truh 2 kơsô̆.”

Mă tơpă ăn ƀôh, Đắk Lắk đei tơdrong tôch ‘lơ̆ng găh choh jang xa păng ưh tam mă pran ‘lơ̆ng găh jang kơmăy – pơvih pơvăn, jang khoa hŏk kơmăy kơmŏk. Jăl jang đơ̆ng 2026-2031, Bơngai tang măt Jơnŭm pơgơ̆r kon pơlei păng dôm anih tang măt ăn kon pơlei tơ̆ dêh char, athei pơm lăp hăm lơ tơdrong ‘mĕh vă đơ̆ng kon pơlei găh lơ tơdrong, mă loi jĭ pơtho pơhrăm, tơplih ‘nao rơgei – iung jang xa, teh, jang kơmăy pơm tơmam, pơjing hơnăn tơmam păng jang hơdoi pơih xă anih tĕch mơdro.

Đơ̆ng rŏng kơ tăh hla, tơdrong đei tơrek hlŏh đơ̆ng bơngai tăh hla dang ei jĭ dôm bơngai tang măt đei kơdih kâu pôk rơih vă bơ̆ jang thoi yơ hăm dôm tơdrong vă jang đơ̆ng kơdih. Kiơ̆ ƀok Trần Xuân Định, Kơdră chĕp kơ̆l Khul jang Mặt trận, kueng kơphô̆ 2, phường Thành Công, dêh char Đắk Lắk, bơngai tăh hla vă hơlen năng rim tơdrong păng athei dôm nơ̆r pơkăp adrol kơ pôk rơih đei bơ̆ jang mă ‘lơ̆ng kiơ̆ rim sơnăm lơ̆m jăl jang: “Dôm bơngai tang măt ăn kon pơlei, ‘nŏh jĭ gơng tơƀưh đơ̆ng Đảng hăm kon pơlei. Inh hơmĕng dôm bơngai ‘nŏh oei xa jê̆ kon pơlei, pơvei kơjăp hăm kon pơlei, hlôh vao hơdăh tơdrong arih xa kơ kon pơlei vă pơjing dêh char jang tŏk tơ̆ hơnăp ning mônh."

Kiơ̆ yă Cao Thị Hòa An, Kơdră jang lơ̆m Khul kơdră chĕp kơ̆l Trung ương Đảng, Phó Bí thư chĕp kơ̆l Đảng dêh char, Kơdră Jơnŭm pơgơ̆r kon pơlei dêh char, Kơdră Anih pơgơ̆r pôk rơih dêh char Đắk Lắk, tơdrong pôk rơih bơngai tang măt Quốc hội jăl XVI păng bơngai tang măt Jơnŭm pơgơ̆r kon pơlei jơ̆p tơring jăl jang đơ̆ng 2026–2031 tơ̆ dêh char đei hơmet păng pơgơ̆r ‘lơ̆ng, pơm ‘lơ̆ng ăn tơdrong kon pơlei pơm tơm, trŏ khôi luơ̆t, sơđơ̆ng ‘lơ̆ng păng pơgơ̆r đang ‘lơ̆ng hơiă.

84 ‘nu bơngai tang măt Jơnŭm pơgơ̆r kon pơlei dêh char jăl XI đei bơngai tăh hla lui, pôk hơtŏk ‘nŏh jĭ dôm bơngai rơngei, đei đon ‘lơ̆ng, dơ̆ng tang ăn ăn đon tơchĕng, tơdrong ‘mĕh vă đơ̆ng kon pơlei dôm hơdrĕch hơdrung lơ̆m dêh char. ‘Nâu jĭ tơdrong hưch hanh hai, hơnăp jang tih hai, athei rim bơngai tang măt adrin hơnơ̆ng, hơtŏk đon jang tơnăp lơ̆m jăl jang 'nao:

“Dôm bơngai tang măt, dôm bơngai rơgei, đei đon ‘lơ̆ng, athei hơtŏk đon jang tơnăp, vei kơjăp tơdrong oei xa păng roi tơƀôh trŏ hăm nơ̆r pơma đơ̆ng bơngai tăh hla. Atŭm hăm ‘nŏh, dôm bơngai tang măt athei vang tơchơ̆t dôm tơdrong tih, gĭt kăl kơ tơring păng dăr lăng kơjăp dôm trong jang, tơdrong tơgŭm khôi luơ̆t tơ̆ tơring, vă hơtŏk tơdrong ‘lơ̆ng mư̆h bơ̆ jang đơ̆ng anih dơ̆ng tang ăn kon pơlei tơ̆ hơnăp kơnh.”

Gơ̆h ƀôh, tơdrong jơnei đơ̆ng pôk rơih ưh lăp dơ̆ng ƀât jang keh rim tơdrong hơgăt đĕch mă oei pơih đei 1 jăl trong ‘nao hăm lơ tơdrong hơmĕng. Dôm bơngai tang măt đei rơih dang ei gô hơnhăk ba đon lui đơ̆ng bơngai tăh hla, pơtơm bơ̆jang hơnăp jang đơ̆ng kơdih hăm đon jang tơnăp, bơ̆ jang tơpăt ‘lơ̆ng, vang tơgop hơnhăk Đắk Lắk jang tŏk hrĕnh păng pran kơjăp.