Lêh pơih kĭ tơdrong Tơchơ̆t Hà Nội pơgơ̆r lơ̆m 2 năr ‘năr 25 păng 26/10. Roi tơbăt đơ̆ng Anih pơgơ̆r jang ăn tơbăt, truh dang ei đei 93 khŭl kơdră kơpal, kơdră tơm dôm teh đak kŭm hăm hloh 1.000 ‘nu bơngai tang măt, bơngai chih kơtơ̆ng ang apŭng plĕnh teh hơlen lăng vang truh akŏm.

Anih tơm vei lăng Kŏng an păng Anih tơm Jang tơbôl hlôi jang hơdai kơjăp hăm Anih jang Liên hợp quốc găh ma túy păng pơm glăi vă pơjing tơdrong jang păng 8 tơdrong jang tơ̆ ‘ngoăih kơdră kơpal, 38 pơma dơnuh joăt jang, hloh 20 kơdeng tơmam pơdă. Pơtôch jơ bơ̆jang, Kơdră teh đak pơma hơdăh tơdrong ‘lơ̆ng gĭt kăl đơ̆ng tơdrong jang ƀơ̆t Việt Nam ‘măng mă blŭng iŏk pơgơ̆r lêh pơih kĭ 1 tơdrong tơchơ̆t kơ Liên hợp quốc, tơƀôh hơdăh anih dơ̆ng păng hơnăp jang đơ̆ng Việt Nam lơ̆m jang hơdai apŭng plĕnh teh găh tang găn pơm glăi mạng.