Bơngai tang măt Lê Hữu Trí (khul Khánh Hòa) akhan, minh ƀar tơdrong đei chih akŏm kiơ̆ tơdrong pơm jang adoi oei tơhlăk tơhlĭn. Bơngai tang măt pơtruh nơ̆r hơmet minh ƀar tơdrong tơblang gah nơ̆r chih dah mă pơkăp hơdah vă băt tơdrong glăi (pơhnŏng dah mă ưh đei pơhnŏng) păng tơdrong hli kơ tơdrong pơm glăi đei pơkăp ah Tơdrong 2, atŭm hăm tơchơ̆t băt hơdah tơdrong vă tơjur ƀiơ̆ yoch pơkăp ah Tơdrong 9 vă iŏk yua drơ̆ng minh. Gah tơchơ̆t phak hrŭ păng trong tơlĕch hơmet răm, lơ bơngai tang măt pơtruh nơ̆r tam mă hơtŏk drơ̆ng minh mưh tam mă đei sơkơ̆t tơdrong răm kiơ̆ tơdrong jang păng grŭp ƀơm răm.

Athei iŏk yua tơpă gah trong hơmet mă blŭng, pơklaih dôm tơdrong ming man glăi, hơmet tơdrong 'mê̆ 'mach cham char, nôp tơvih jên đei yua glăi; atŭm hăm noh sơkơ̆t hơdah layơ kăl thu iŏk hla bar phep dah mă pơdơh pơm jang. Gah tơdrong sek tơlang pơm glăi hanh chĭnh, bơngai tang măt Mai Phương Hoa (khul Ninh Bình) pơtruh nơ̆r hăm tơdrong jang mă ayơ kăl pơdui đunh khei năr phak hrŭ truh 3 sơnăm noh athei hơlen mă hơdah, trŏ hăm tơdrong đei, tang găn pơdui đunh ưh kơ kăl. Tơrĕk truh tơdrong phak hăm jên, chih akŏm Luơ̆t Sek tơlang pơm glăi hanh chĭnh pơkăp hăm jên lơ hloh lơ̆m sek phak hrŭ hanh chĭnh noh 1,5 tih hlj hăm tơ-'ngla păng 3 tih hlj hăm hơnih jang. Thoi noh, hơtŏk kơjung hloh 1,5 'măng pơtêng hăm luơ̆t oei yua dang ei. Bơngai tang măt akhan, athei hơlen lăng, sơkơ̆t hơdah đơ̆ng lơ tơdrong gah pơkăp phak ou, vă vei sơđơ̆ng tơdrong kơjăp đơ̆ng khôi luơ̆t, păng ưh đei răm truh tơdrong hơrih, pơm jang tĕch pơdro kơ kon pơlei, hơnih jang mŭk drăm.