2 năr đơ̆ng rŏng kơ plei Nhin tơmât hơdai hăm plei Nghĩa Hưng 1 păng Nghĩa Hưng 2 jing plei Nghĩa Hưng 2, xăh Biển Hồ, ‘nhŏng Siu Ayun, bơngai đei kon pơlei lui yom tơ̆ pơlei, kŭm hăm ƀok pơgơ̆r pơlei năm dăr lăng tơ̆ lơ trong tih mă kon pơlei oei hơpơi ‘meh jang man trong bê tông. Đơ̆ng rŏng kơ tơmât hơdai, tơdrong mă kon pơlei tơrek hlŏh ưh lăp hơnăn krao đĕch mă dôm tơdrong ƀơm truh tơdrong arih xa kơ kon pơlei đei sek tơlang hrĕnh dăh mă ưh.

‘Nhŏng Siu Ayun ăn tơbăt, mưh kơtơ̆ng trong jang tơmât hơdai 2 pơlei mă lơ ‘nŏh jĭ bơngai Yoăn, lơ bơngai lơ̆m pơlei kŭm tơtăm yoa tơdrong juăt, tơdrong arih xa pha ra băl. Mă lei kiơ̆ đơ̆ng lơ ‘măng pơma nuh, roi tơbăt păng krao hơvơn, kon pơlei hlôh vao akhan, tơdrong tơmât hơdai ưh đei pơm tơhiong tơdrong juăt kơ pơlei mă vă pơjing tơdrong pơvei băl kơjăp ‘lơ̆ng, vang tơgŭm băl jang tŏk: "Nhen brei drou nhôn hơnơ̆ng tơtăm, kŭm đei nơ̆r pơma truh tơ̆ trong pơlei pơla, kueng ƀôt. Ƀok pơgơ̆r pơlei dang ei đei hŏk jrŭ ƀiơ̆, jang rơgei ƀiơ̆, oei ‘lơ̆p ƀiơ̆ hai, krao sư ‘nŏh sư năm truh hloi. Inh ‘mĕh đơ̆ng ƀok pơgơ̆r pơlei truh tơ̆ Măt trân adrin jang ăn kon pơlei, jê̆ kon pơlei vă tơgŭm ăn kon pơlei lơ ƀiơ̆."

Hơmĕng kon pơlei jê̆ khul kơdră tơring, khul kơdră tơring bơ̆ jang ‘lơ̆ng hăm kon pơlei ‘nŏh kŭm jing tơdrong đei tơlĕch hăm đe kăn ƀô̆ tơring ‘năi. Hăm ‘nhŏng Đỗ Văn Túc, ƀok pơgơ̆r plei Nghĩa Hưng 2, xăh Biển Hồ, đơ̆ng rŏng kơ 15 sơnăm hơnơ̆ng pơm ƀok pơgơ̆r pơlei, jăl jang ‘nâu roi trăp ƀiơ̆. Đơ̆ng rŏng kơ tơmât hơdai, pơlei đei hlŏh 600 unh hnam, hăm hlŏh 2.400 ‘nu bơngai. Pơlei xă hlŏh 3 ‘măng adrol ki. Tơdăh vei lăng kiơ̆ trong so ‘nŏh tôch pơmat tat vă gơ̆h băt rim tơdrong hơpơi ‘mĕh đơ̆ng kon pơlei. Yoa thoi noh, đơ̆ng rŏng đei hơmet ming, Chi ƀô̆ păng Khul vei lăng pơlei pơjing trong jang tôch rơđăh, klăih song kueng, pơjao ăn kăn ƀô̆ vei lăng. Tơchĕng adrol, rim giĕng, Khul vei lăng pơgơ̆r jur tơ̆ rim kueng pơgơ̆r hôp hăm kon pơlei, atŭm hăm ‘nŏh vei kơjăp grŭp jang trư̆k tuyê̆n vă sơng iŏk, sek tơlang dôm tơdrong hrĕnh hlŏh.

Ƀok pơgơ̆r plei Nghĩa Hưng 2 Đỗ Văn Túc pơma: “Tơring xă, nơ̆r pơma, tơdrong juăt pha ra băl. Truh âu kơnh vă jang kiơ̆ kơmăy sô̆ lơ̆m tơdrong arih xa kơ kon pơlei, tơring yoăn oei thoi yơ, tơring kon kông thoi yơ, pơm liơ vă pơvih ăn kon pơlei păng jang đang ‘lơ̆ng tơdrong jang ‘nŏh jĭ tơdrong inh tơtăm hlŏh. Đơ̆ng rŏng kơ iŏk đei tơdrong tơchơ̆t ‘nŏh inh pơjing hloi trong jang. Adrol ki vei lăng pơlei iĕ ba jang pha, ưh gan kơchăng ƀiơ̆. Mă lei, dang ei tơring xă thoi âu athei pơjing trong jang mă hơdăh lăp hăm tơring xă, lăp hăm tơring đei lơ kon pơlei”.

Đơ̆ng 40 pơlei adrol ki, đơ̆ng rŏng kơ tơmât hơdai, xăh Biển Hồ oei đei pă 23 pơlei, jur 42,5%. Kŭm hăm tơdrong kăt tơjur pơlei, tơring oei hơmet ming khul Bí thư chi ƀô̆, ƀok Pơgơ̆r pơlei kiơ̆ trong rơih bơngai đei hŏk jrŭ, jang rơgei păng gơ̆h tơmât yoa kơmăy kơmŏk mưh pơgơ̆r vei lăng.

Lơ̆m dêh char truh ‘năr 2/7, Gia Lai hlôi jang đang tơdrong hơmet ming đơ̆ng 2.693 jur pă 1.400 pơlei, kueng kơphô̆, jur 1.293 pơlei, hơtŏ hăm 48,01%. Ƀok Nguyễn Thanh Vũ, Phŏ Kơdră Anih jang Nội vụ dêh char Gia Lai ăn tơbăt, tơjur pơlei ‘nŏh jĭ 1 đon pơhnŏng vă hơmet ming pơlei. Tơdrong kăl hlŏh ‘nŏh hơtŏk tơdrong ‘lơ̆ng, rơgei ăn khul kăn ƀô̆ tơring vă khul kơdră pơgơ̆r tơring gơ̆h vei lăng kơjăp, pơvih ăn kon pơlei roi ‘lơ̆ng ƀiơ̆ mưh tơring vei lăng roi xă. Dêh char oei hơnơ̆ng hơmet kơjăp khul jang, hơdai hăm hơlen năng păng pơjing trong pơtho pơhrăm ming ăn đe Bí thư chi ƀô̆, ƀok pơgơ̆r pơlei kiơ̆ trong pơm lăp hăm tơdrong vei lăng tơ̆ tơring lơ̆m chăl ‘nao.

Ƀok Nguyễn Thanh Vũ, Phŏ Kơdră Anih jang Nội vụ dêh char Gia Lai pơma: "Kiơ̆ tơdrong hơgăt kơsô̆ 185/2026/NĐ-CP ‘năr 26/5/2026 Khul kơdră teh đak, lơ̆m noh đei pơjao hơnăp jang ăn dêh char athei tơlĕch tơdrong hơgăt tơdrong hŏk pơhrăm gơ̆h bơ̆ jang, đơ̆ng rŏng kơ ‘nŏh đei trong pơtho pơhrăm kiơ̆ nơ̆r athei đơ̆ng Trung ương. Hăm dôm bơngai âu, athei hŏk đơ̆ng lăm 12 tŏk tơ̆ kơpal. Mă 2 dơ̆ng ‘noh băt yoa kơmăy kơmŏk. Bí thư chi ƀô̆ athei gơ̆h iŏk yoa hla ar điên tư chih răk rim tơdrong, ‘nâu jĭ 1 păh lơ̆m tơdrong jang tơplih hăm kơmăy sô̆. Hăm khul jang âu, rim sơnăm hơnơ̆ng đei trong pơtho pơhrăm ming. Ưh jor mưh hơmet đang ‘lơ̆ng kơnh, dêh char gô đei trong pơtho pơhrăm hrôih vă ‘nhŏng oh sơđơ̆ng jơhngâm păng bơ̆ jang roi ‘lơ̆ng tơ̆ hơnăp kơnh."

Đơ̆ng rŏng kơ tơmât hơdai pơlei, kueng kơphô̆, Gia Lai hlôi kăt tơjur đei vă jê̆ 1 puăt kơsô̆ pơlei tơ̆ tơring. Mă lei tơdrong jơnei đơ̆ng trong jang ‘nâu ưh lăp năng kiơ̆ kơsô̆ pơlei đei tơjur đĕch, mă oei tơ̆ tơdrong, hơnơ̆ng pơjing khul kăn ƀô̆ tơ̆ tơring roi rơgei, tơplih ‘nao trong pơgơ̆r vei lăng vă pơvih ăn kon pơlei roi ‘lơ̆ng ƀiơ̆.