Tơ̆ hop akŏm, lơ nơ̆r pơma akhan, tơdrong tơhlăk tih hlŏh hrei ‘nâu ưh đei lơ̆m trong jang mă đei lơ̆m tơdrong pơgơ̆r jang. Mĭnh ƀar hla ar vei lăng mưh pơm oei hiong lơ jơnăr ăn kon pơlei păng anih tĕch mơdro; kơsô̆ chih răk đơ̆ng dôm anih jang kơpal tam mă hiôk ‘lơ̆ng; tơdrong jang kiơ̆ dôm kơmăy sô̆ oei tam mă pran; kơplăh ‘nŏh tơdrong pơvih pơvăn păng đon bơ̆ jang đơ̆ng 1 păh kơsô̆ kăn ƀô̆, bơngai jang ăn teh đak kŭm tam mă pơm lăp hăm tơdrong ‘mĕh vă lơ̆m chăl ‘nao.

Yă Hồ Thị Nguyên Thảo, Phŏ Kơdră chĕp kơ̆l Anih vei lăng kon pơlei dêh char Đắk Lắk athei dôm anih jang, khul grŭp, tơring tơrang hơtŏk đon jang tơnăp ăn bơngai chĕp kơ̆l mưh bơ̆ jang hơmet ming trong pơm hla ar vei lăng; hơtŏk tơdrong hơlen năng, kăt tơjur, pơm ƀônh hiôk hăm dôm hla ar vei lăng; hơtŏk tơdrong jang hơdoi, pơtruh ăn băl rim kơsô̆ chih răk đơ̆ng rim kơmăy kơmŏk roi tơbăt hăm kơsô̆ chih răk kơ teh đak; hơnơ̆ng hơmet ming, pơtruh khul kăn ƀô̆ mă lăp hăm tơdrong jang.